ਨਵੀਂ ਦਿੱਲੀ - ਨੇਤਾ ਜੀ ਸੁਭਾਸ਼ ਚੰਦਰ ਬੋਸ ਜੀ ਦਾ 23 ਜਨਵਰੀ ਨੂੰ ਜਨਮ ਦਿਨ ਹੈ ਅਤੇ ਉਨ੍ਹਾਂ ਦੀ ਮੌਤ ਦਾ ਭੇਤ 62 ਸਾਲ ਬਾਅਦ ਵੀ ਨਹੀਂ ਖੁੱਲ੍ਹ ਸਕਿਆ ਹੈ। ਇਤਿਹਾਸ ਦੀਆਂ ਕਿਤਾਬਾਂ ਵਿੱਚ ਇਹ ਗੱਲ ਆਖੀ ਗਈ ਹੈ ਕਿ 18 ਅਗਸਤ 1945 ਨੂੰ ਤਾਈਵਾਨ ਨੇੜੇ ਹੋਏ ਇੱਕ ਹਵਾਈ ਹਾਦਸੇ ਵਿੱਚ ਨੇਤਾ ਜੀ ਦੀ ਮੌਤ ਹੋ ਗਈ ਸੀ ਅਤੇ ਉਨ੍ਹਾਂ ਦੀਆਂ ਅਸਥੀਆਂ ਜਾਪਾਨ ਦੇ ਇੱਕ ਮੰਦਰ ਵਿੱਚ ਪਈਆਂ ਹਨ ਪਰ ਬਹੁਤੇ ਇਤਿਹਾਸਕਾਰ ਇਸਨੂੰ ਸਹੀ ਨਹੀਂ ਮੰਨਦੇ ਹਨ ਅਤੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਤਾਈਨਵਾਨ ਨੇੜੇ 18 ਅਗਸਤ 1945 ਨੂੰ ਕੋਈ ਹਵਾਈ ਹਾਦਸਾ ਨਹੀਂ ਹੋਇਆ ਸੀ। ਇੰਨਾ ਹੀ ਨਹੀਂ ਗੁੰਮਨਾਮੀ ਬਾਬਾ ਵਰਗੇ ਕਈ ਚਰਿੱਤਰਾਂ ਨੇ ਨੇਤਾ ਜੀ ਦੀ ਮੌਤ ਦੇ ਭੇਦ ਨੂੰ ਹੋਰ ਡੂੰਘਾ ਕਰ ਦਿੱਤਾ ਹੈ ਅਤੇ ਗੁੰਮਨਾਮੀ ਬਾਬਾ ਦੇ ਨਾਲ ਹੀ ਕਈ ਹੋਰ ਸਾਧੂ ਸੰਤਾਂ ਨੇ ਨੇਤਾ ਜੀ ਨੂੰ ਜਿ਼ੰਦਾ ਦੱਸਿਆ ਹੈ। ਕਈ ਇਤਿਹਾਸਕਾਰਾਂ ਦਾ ਇਹ ਵੀ ਕਹਿਣਾ ਹੈ ਕਿ ਸਰਕਾਰ ਨੇਤਾ ਜੀ ਦੀ ਮੌਤ ਸਬੰਧੀ ਬਹੁਤ ਕੁਝ ਲੁਕੋ ਰਹੀ ਹੈ। ਜੇ ਜਾਪਾਨ ਦੇ ਇੱਕ ਮੰਦਰ ਵਿੱਚ ਨੇਤਾ ਜੀ ਦੀਆਂ ਅਸਥੀਆਂ ਪਈਆਂ ਹਨ ਤਾਂ ਫੇਰ ਉਨ੍ਹਾਂ ਦੀ ਡੀ.ਐੱਨ.ਏ. ਜਾਂਚ ਕਿਉਂ ਨਹੀਂ ਕਰਵਾਈ ਗਈ। ਇਤਿਹਾਸਕਾਰ ਮਾਲਤੀ ਮਲਿਕ ਦਾ ਕਹਿਣਾ ਹੈ ਕਿ ਇਨ੍ਹਾਂ ਅਸਥੀਆਂ ਦੀ ਜਾਂਚ ਕਰਵਾਈ ਜਾਣੀ ਚਾਹੀਦੀ ਹੈ ਤਾਂ ਜੋ ਸੱਚਾਈ ਸਾਹਮਣੇ ਆ ਸਕੇ।

ਇਸਲਾਮਾਬਾਦ - ਪਾਕਿਸਤਾਨ ਪੀਪਲਜ਼ ਪਾਰਟੀ ਦੇ ਕੋ-ਚੇਅਰਮੈਨ ਆਸਿਫ ਅਲੀ ਜ਼ਰਦਾਰੀ ਨੇ ਆਪਣੀ ਪਤਨੀ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਬੇਨਜ਼ੀਰ ਭੁੱਟੋ ਦੀ ਹੱਤਿਆ ਬਾਰੇ ਯੂ.ਐੱਨ. ਜਾਂਚ ਦੀ ਮੰਗ ਲਈ ਸਮਰਥਨ ਦੀ ਮੰਗ ਕਰਦਿਆਂ ਅਮਰੀਕਾ ਨੂੰ ਬੇਨਤੀ ਕੀਤੀ ਹੈ ਕਿ ਰਾਸ਼ਟਰਪਤੀ ਪ੍ਰਵੇਜ਼ ਮੁਸ਼ੱਰਫ ਉੱਪਰ ਇਹ ਯਕੀਨੀ ਬਣਾਉਣ ਲਈ ਦਬਾਅ ਪਾਇਆ ਜਾਵੇ ਕਿ ਸੰਸਦੀ ਚੋਣਾਂ ਆਜ਼ਾਦ ਅਤੇ ਨਿਰਪੱਖ ਤਰੀਕੇ ਨਾਲ ਕਰਵਾਈਆਂ ਜਾਣ। ਉਨ੍ਹਾਂ ਬੁਸ਼ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਪਾਕਿਸਤਾਨ ਸਰਕਾਰ ਨੂੰ ‘ਤਾੜਨਾ’ ਕਰਨ ਕਿ ਅਗਾਮੀ ਚੋਣਾਂ ਵਿੱਚ ਬੇਨਿਯਮੀਆਂ ਦੇ ਮਾੜੇ ਨਤੀਜੇ ਹੋਣਗੇ। ਅਮਰੀਕੀ ਵਿਦੇਸ਼ ਮੰਤਰੀ ਕੋਂਡਾਲੀਜ਼ਾ ਰਾਈਸ ਨੂੰ ਲਿਖੇ ਇੱਕ ਖ਼ਤ, ਜ਼ਰਦਾਰੀ ਨੇ ਬੇਨਜੀਰ ਦੀ ਹੱਤਿਆ ਬਾਰੇ ਯੂ.ਐੱਨ. ਜਾਂਚ ਲਈ ਆਪਣੀ ਮੰਗ ਪ੍ਰਤੀ ਅਮਰੀਕੀ ਸਮਰਥਨ ਦੀ ਮੰਗ ਵੀ ਕੀਤੀ। ਉਨ੍ਹਾਂ ਲਿਖਿਆ ਹੈ, “ਵਰਤਮਾਨ ਜਾਂਚ ਵਿੱਚ ਸਕਾਟਲੈਂਡ ਯਾਰਡ ਦੀ ਸ਼ਮੂਲੀਅਤ ਦਾ ਪਾਰਟੀ ਸਵਾਗਤ ਕਰਦੀ ਹੈ ਜਦਕਿ ਇਸਦਾ ਪੱਕਾ ਯਕੀਨ ਹੈ ਕਿ ਇਸ ਘਟਨਾ ਦੀ ਖੌਫਨਾਕ ਫਿਤਰਤ ਪੂਰੀ ਸਾਵਧਾਨੀ ਅਤੇ ਵਿਸ਼ਵ ਭਾਈਚਾਰੇ ਦੀ ਸ਼ਮੂਲੀਅਤ ਦੀ ਮੰਗ ਕਰਦੀ ਹੈ। ਕੇਵਲ ਅਜਿਹਾ ਦਖਲ ਹੀ ਯਕੀਨੀ ਬਣਾ ਸਕਦਾ ਹੈ ਕਿ ਇਸ ਘਿਨਾਉਣੇ ਅਪਰਾਧ ਦੇ ਸਾਜਿਸ਼ਕਾਰ ਅਤੇ ਇਸ ਉੱਪਰ ਪਰਦਾ ਪਾਉਣ ਦੇ ਯਤਨਸ਼ੀਲ ਵੀ ਇਨਸਾਫ ਅਤੇ ਤਲਬ ਕੀਤੇ ਜਾਣ।”