ਨਵੀਂ ਦਿੱਲੀ- ਭਾਰਤੀ ਹਾਕੀ ਸੰਘ ਦੀ ਚੋਣ ਕਮੇਟੀ ਦੇ ਮੁਖੀ ਅਸਲਮ ਸ਼ੇਰ ਖ਼ਾਨ ਨੇ ਕਿਹਾ ਕਿ ਸੰਘ ਦੇ ਮੁਖੀ ਅਹੁਦੇ ਤੋਂ ਹਟਾਏ ਜਾਣ ਤੋਂ ਬਾਅਦ ਵੀ ਕੇ.ਪੀ.ਐਸ. ਗਿੱਲ ਦੇਸ਼ ‘ਚ ਹਾਕੀ ਨੂੰ ਨੁਕਸਾਨ ਪਹੁੰਚਾਉਣ ‘ਚ ਲਗਿਆ ਹੋਇਆ ਹੈ। ਅਸਲਮ ਨੇ ਕਿਹਾ ਕਿ ਇਹ ਤਾਂ ਸੱਭ ਨੂੰ ਪਤਾ ਹੈ ਕਿ ਗਿੱਲ 14 ਸਾਲਾਂ ਤਕ ਭਾਰਤੀ ਹਾਕੀ ਸੰਘ ਦਾ ਮੁਖੀ ਰਿਹਾ ਅਤੇ ਉਸ ਦੀ ਸੱਭ ਤੋਂ ਵੱਡੀ ਪ੍ਰਾਪਤੀ ਇਹ ਹੀ ਕਿ ਟੀਮ 80 ਸਾਲਾਂ ਦੇ ਇਤਿਹਾਸ ‘ਚ ਪਹਿਲੀ ਵਾਰ ਉਲੰਪਿਕ ਖੇਡਾਂ ‘ਚ ਕੁਆਲੀਫ਼ਾਈ ਨਹੀਂ ਕਰ ਸਕੀ। ਉਸ ਨੇ ਕਿਹਾ ''11 ਜੂਨ ਤੋਂ ਪੋਲੈਂਡ ‘ਚ 19 ਸਾਲ ਤੋਂ ਘੱਟ ਉਮਰ ਦੇ ਹਾਕੀ ਖਿਡਾਰੀਆਂ ਲਈ ਚਾਰ ਦੇਸ਼ਾਂ ਦਾ ਮੁਕਾਬਲਾ ਹੋਣਾ ਹੈ ਅਤੇ ਅਹੁਦੇ ਤੋਂ ਹਟਾਏ ਜਾਣ ਦੇ ਬਾਵਜੂਦ ਗਿੱਲ ਨੇ ਪੋਲੈਂਡ ‘ਚ ਮੁਕਾਬਲੇ ਦੇ ਆਯੋਜਕਾਂ ਨੂੰ ਇਕ ਪੱਤਰ ਲਿਖ ਕੇ ਭੇਜ ਕੇ ਇਹ ਕਹਿ ਦਿਤਾ ਕਿ ਭਾਰਤੀ ਟੀਮ ਇਸ ‘ਚ ਕੁੱਝ ਕਾਰਨਾਂ ਕਰ ਕੇ ਹਿੱਸਾ ਨਹੀਂ ਲੈ ਸਕੇਗੀ। ਉਸ ਨੇ ਕਿਹਾ ਕਿ ਪੋਲੈਂਡ ‘ਚ ਮੁਕਾਬਲੇ ਦੇ ਆਯੋਜਕਾਂ ਨੂੰ ਸ਼ਾਇਦ ਇਹ ਨਹੀਂ ਪਤਾ ਸੀ ਕਿ ਗਿੱਲ ਹੁਣ ਭਾਰਤੀ ਹਾਕੀ ਸੰਘ ਦੇ ਮੁਖੀ ਨਹੀਂ ਹਨ ਅਤੇ ਉਨ੍ਹਾਂ ਵਲੋਂ ਭੇਜੇ ਪੱਤਰ ਨੂੰ ਮਹੱਤਵ ਦੇਣ ਦਾ ਕੋਈ ਵੀ ਅਰਥ ਨਹੀਂ ਹੈ। ਅਸਲਮ ਨੇ ਕਿਹਾ ਕਿ ਗਿੱਲ ਵਲੋਂ ਭੇਜੇ ਗਏ ਇਸ ਪੱਤਰ ਤੋਂ ਬਾਅਦ ਮੁਕਾਬਲੇ ਦੇ ਆਯੋਜਕਾਂ ਨੇ ਭਾਰਤ ਦੀ ਥਾਂ ‘ਤੇ ਇਸ ‘ਚ ਆਸਟਰੀਆ ਨੂੰ ਲੈ ਲਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਜੇ ਇਸ ਸਮੇਂ ਕੋਸ਼ਿਸ਼ਾਂ ਕੀਤੀਆਂ ਜਾਣ ਤਾਂ ਭਾਰਤ ਨੂੰ ਸ਼ਾਇਦ ਹੁਣ ਵੀ ਇਸ ਮੁਕਾਬਲੇ ‘ਚ ਖੇਡਣ ਦਾ ਮੌਕਾ ਮਿਲ ਸਕਦਾ ਸੀ ਪਰ ਇਕ ਵਾਰ ਆਸਟਰੀਆ ਨੂੰ ਬੁਲਾ ਕੇ ਉਸ ਨੂੰ ਵਾਪਸ ਜਾਣ ਲਈ ਕਹਿਣਾ ਠੀਕ ਨਹੀਂ ਹੋਵੇਗਾ। ਅਸਲਮ ਨੇ ਕਿਹਾ ਕਿ ਗਿੱਲ ਨੇ ਇਸ ਮਾਮਲੇ ‘ਚ ਇਸ ਗੱਲ ਦਾ ਫ਼ਾਇਦਾ ਉਠਾਇਆ ਕਿ ਇਸ ਸਾਲ 28 ਅਪ੍ਰੈਲ ਨੂੰ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਏ ਜਾਣ ਦੀ ਖ਼ਬਰ ਯੂਰਪੀ ਦੇਸ਼ਾਂ ਤਕ ਪਹੁੰਚ ਨਹੀਂ ਸਕੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਗੱਲ ਤੋਂ ਇਹ ਪਤਾ ਚਲਦਾ ਹੈ ਕਿ ਗਿੱਲ ਹੁਣ ਵੀ ਦੇਸ਼ ‘ਚ ਹਾਕੀ ਨੂੰ ਨੁਕਸਾਨ ਪਹੁੰਚਾਉਣ ‘ਚ ਕੋਈ ਕਸਰ ਨਹੀਂ ਛੱਡਣਾ ਚਾਹੁੰਦੇ। ਅਸਲਮ ਨੇ ਕਿਹਾ ਕਿ ਜੇ 19 ਸਾਲਾਂ ਤੋਂ ਘੱਟ ਉਮਰ ਦੇ ਖਿਡਾਰੀ ਮੁਕਾਬਲੇ ‘ਚ ਹਿੱਸਾ ਲੈ ਲੈਂਦੇ ਤਾਂ ਇਹ ਭਾਰਤ ਦੇ ਹਾਕੀ ਭਵਿੱਖ ਲਈ ਬਹੁਤ ਚੰਗਾ ਹੁੰਦਾ।

ਇਟਲੀ (ਗੁਰਮੁਖ ਸਿੰਘ ਸਰਕਾਰੀਆ)  ਇਟਲੀ ਦੀਆਂ ਸਾਰੀਆਂ ਖੇਡ ਕਲੱਬਾਂ ਤੇ ਫੈਡਰੇਸ਼ਨਾਂ ਦੀ ਇੱਕ ਜਰੂਰੀ ਮੀਟਿੰਗ 20 ਅਪ੍ਰੈਲ ਨੂੰ ਬਰੇਸ਼ੀਆ ਦੇ ਸ਼ਹਿਰ ਬਨਿਉਲੋਮੇਲਾ ਵਿਖੇ ਹਵੇਲੀ ਰੈਸਟੋਰੈਂਟ ਫ਼ ਬਾਰ ਵਿਚ ਬੁਲਾਈ ਗਈ ਹੈ, ਜਿਸ ਵਿਚ ਸਾਲ 2008 ਵਿਚ ਹੋਣ ਵਾਲੇ ਖੇਡ ਮੇਲਿਆਂ ਬਾਰੇ ਵਿਚਾਰਾਂ ਕੀਤੀਆਂ ਜਾਣਗੀਆਂ। ਇਸ ਮੀਟਿੰਗ ਵਿਚ ਇਟਲੀ ਦੀ ਹਰ ਇੱਕ ਖੇਡ ਕਲੱਬ ਨੂੰ ਪਹੁੰਚ ਕੇ ਵਿਚਾਰਾਂ ਵਿਚ ਹਿੱਸਾ ਲੈਣ ਦਾ ਖੁੱਲਾ ਸੱਦਾ ਹੈ ਤੇ ਹਰੇਕ ਕਲੱਬ ਜਾਂ ਫੈਡਰੇਸ਼ਨ ਦੇ ਦੋ ਮੈਂਬਰ ਹੀ ਆਉਣ। ਇਹ ਮੀਟਿੰਗ ਸਵੇਰੇ 10:30 ਵਜੇ ਸ਼ੁਰੂ ਹੋਵੇਗੀ ਤੇ 11:30 ਵਜੇ ਪ੍ਰੈੱਸ ਕਾਨਫਰੰਸ ਵਿਚ ਪਾਸ ਕੀਤੇ ਮਤਿਆਂ ਦਾ ਐਲਾਨ ਕੀਤਾ ਜਾਵੇਗਾ। ਇਟਲੀ ਦੇ ਸਾਰੇ ਮੀਡੀਏ ਨੂੰ ਪਹੁੰਚ ਕੇ ਕਵਰੇਜ਼ ਕਰਨ ਦਾ ਵੀ ਖੁੱਲਾ ਸੱਦਾ ਹੈ। ਇਸ ਮੀਟਿੰਗ ਦਾ ਸੱਦਾ ਸ੍ਰੀ ਅਨਿਲ ਸ਼ਰਮਾ(ਪ੍ਰਧਾਨ ਐਮਿਚਿਉਰ ਕਬੱਡੀ ਫੈਡਰੇਸ਼ਨ ਤੇ ਸੱਲਾ ਸਪੋਰਟਸ ਕਲੱਬ ਬਰੇਸ਼ੀਆ) ,ਸ੍ਰੀ ਰਾਜ ਕੁਮਾਰ ਸੱਲਾ(ਚੇਅਰਮੈਨ ਸੱਲਾ ਸਪੋਰਟਸ ਕਲੱਬ ਬਰੇਸ਼ੀਆ) ,ਸ੍ਰ ਸੁਰਿੰਦਰ ਸਿੰਘ ਜੈਲਦਾਰ(ਸੀਨੀਅਰ ਵਾਈਸ ਪ੍ਰਧਾਨ ਸੱਲਾ ਸਪੋਰਟਸ ਕਲੱਬ ਬਰੇਸ਼ੀਆ), ਸ੍ਰ. ਸੁਰਜੀਤ ਸਿੰਘ ਵਿਰਕ (ਵਾਈਸ ਚੇਅਰਮੈਨ) ਨੇ ਦਿੱਤਾ ਤੇ ਇਹਨਾਂ ਤੋਂ ਇਲਾਵਾ  ਰਾਣਾ ਗੁਰਜੀਤ, ਜੱਸਾ ਪੀ.ਟੀ,ਕ੍ਰਿਪਾਲ ਸਿੰਘ ਹੁੰਦਲ, ਕਬੱਡੀ ਰੇਡਰ ਸੱਤਾ ਮੀਆਂਵਿੰਡ , ਮੇਜਰ ਢੰਡੋਵਾਲੀਆ ਤੇ ਦੂਜੇ ਪੰਜਾਬ (ਪਾਕਿਸਤਾਨ) ਤੋਂ ਸੱਯਦ ਸਾਹਿਬ ਪ੍ਰਮੁੱਖ ਸਨ।

20 ਅਪ੍ਰੈਲ ਨੂੰ ਰੋਮ ਵਿਖੇ ਅਲੌਕਿਕ ਨਗਰ ਕੀਰਤਨ
ਰੋਮ-ਇਟਲੀ (ਗੁਰਮੁਖ ਸਿੰਘ ਸਰਕਾਰੀਆ)-ਇਟਲੀ ਦੀ ਰਾਜਧਾਨੀ ਰੋਮ ਵਿਖੇ 20 ਅਪ੍ਰੈਲ 2008 ਨੂੰ ਖਾਲਸਾ ਪੰਥ ਦੇ ਸਾਜਨਾ ਪੁਰਬ ਨੂੰ ਮੁੱਖ ਰੱਖਦਿਆਂ ਅਲੌਕਿਕ ਨਗਰ ਕੀਰਤਨ ਕੱਢਿਆ ਜਾਵੇਗਾ। ਧੰਨ ਧੰਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਛਤਰ ਛਾਇਆ ਹੇਠ ਪੰਜਾਂ ਪਿਆਰਿਆਂ ਦੀ ਅਗਵਾਈ ਵਿਚ ਇਸ ਨਗਰ ਕੀਰਤਨ ਵਿਚ ਯੂਰਪ ਭਰ ਤੋਂ ਸੰਗਤਾਂ ਹੁੰਮ-ਹੁਮਾ ਕੇ ਪਹੁੰਚ ਰਹੀਆਂ ਹਨ। ਰੋਮ ਵਿਖੇ ਨਗਰ ਕੀਰਤਨ ਦਾ ਪ੍ਰਬੰਧ ਇਲਾਕਾ ਨਿਵਾਸੀਆਂ ਦੇ ਸਹਿਯੋਗ ਨਾਲ ਕੀਤਾ ਗਿਆ ਹੈ। ਇਸ ਸਬੰਧੀ ਵਧੇਰੀ ਜਾਣਕਾਰੀ ਲਈ ਗੁਰਦੁਆਰਾ ਸ੍ਰੀ ਗੁਰੂ ਨਾਨਕ ਦਰਬਾਰ ਰੋਮਾ ਦੀ ਪ੍ਰਬੰਧਕ ਕਮੇਟੀ ਦੇ ਸੇਵਾਦਾਰਾਂ ਨਾਲ 3396119352 (ਭਾਈ ਬਲਕਾਰ ਸਿੰਘ), 3393792810 (ਕੁਲਵਿੰਦਰ ਸਿੰਘ ਅਟਵਾਲ), 3395371944 (ਭਾਰਤ ਪ੍ਰਕਾਸ਼ ਪਾਸ਼ੀ) ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ। ਇਟਲੀ ਦੀਆਂ ਸਮੂਹ ਧਾਰਮਿਕ ਜਥੇਬੰਦੀਆਂ, ਗੁਰਦੁਆਰਾ ਕਮੇਟੀਆਂ ਨੂੰ ਸਹਿਯੋਗ ਦੇਣ ਦੀ ਅਪੀਲ ਹੈ। ਸਮੂਹ ਮੀਡੀਆ ਕਰਤਾ ਅਤੇ ਪੱਤਰਕਾਰਾਂ ਨੂੰ ਕਵਰੇਜ ਕਰਨ ਦਾ ਖੁੱਲਾ ਸੱਦਾ ਹੈ।