ਲੁਧਿਆਣਾ- ਮਸ਼ਹੂਰ ਖ਼ੇਡ ਚੈਨਲ ਈਐਸਪੀਐਨ-ਸਟਾਰ ਸਪੋਰਟਸ (ਈਐਸਐਸ) ਨੇ ਅੰਤਰਰਾਸ਼ਟਰੀ ਫ਼ੁੱਟਬਾਲ ਸੰਸਥਾ ਫ਼ੀਫ਼ਾ ਨਾਲ ਇੱਕ ਨਵੇਂ ਇਕਰਾਰਨਾਮੇ ‘ਤੇ ਹਸਤਾਖ਼ਰ ਕੀਤੇ ਹਨ। ਇਸ ਦੇ ਤਹਿਤ ਭਾਰਤੀ ਉਪ-ਮਹਾਂਦੀਪ ਦੇ ਦਰਸ਼ਕਾਂ ਦੇ ਮਨੋਰੰਜਨ ਲਈ 2010 ਦੇ ਫ਼ੀਫ਼ਾ ਵਿਸ਼ਵ ਕੱਪ ਸਮੇਤ ਫ਼ੀਫ਼ਾ ਲੜੀ ਦੇ ਅੰਤਰਰਾਸ਼ਟਰੀ ਫ਼ੁੱਟਬਾਲ ਟੂਰਨਾਮਂੈਟ ਦਾ ਪ੍ਰਸਾਰਣ 'ਈਐਸਪੀਐਨ-ਸਟਾਰ ਸਪੋਰਟਸ‘ ਚੈਨਲ ਕਰੇਗਾ।
ਇਕਰਾਰਨਾਮੇ ਦੀਆਂ ਸ਼ਰਤਾਂ ਮੁਤਾਬਿਕ ਈਐਸਪੀਐਨ-ਸਟਾਰ ਸਪੋਰਟਸ ਕੋਲ ਫ਼ੁੱਟਬਾਲ ਦੇ 275 ਅੰਤਰਰਾਸ਼ਟਰੀ ਮੁਕਾਬਲਿਆਂ ਦੇ ਪ੍ਰਸਾਰਣ ਦੇ ਅਧਿਕਾਰ ਹੋਣਗੇ। ਇਨ੍ਹਾਂ ਵਿਚ ਵਿਸ਼ਵ ਕੱਪ ਤੋਂ ਇਲਾਵਾ ਫ਼ੀਫ਼ਾ ਕਨਫ਼ੈਡਰੇਸ਼ਨ ਕੱਪ 2009 ਵੀ ਸ਼ਾਮਿਲ ਹੈ। ਜਿੱਥੋਂ ਤੱਕ ਵਿਸ਼ਵ ਕੱਪ ਦਾ ਸਬੰਧ ਹੈ, ਤਾਂ ਇਹ ਟੂਰਨਾਮੈਂਟ 11 ਜੂੁਨ ਤੋਂ 11 ਜੁਲਾਈ ਤੱਕ ਦੱਖਣੀ ਅਫ਼ਰੀਕਾ ਵਿਖੇ ਕਰਵਾਇਆ ਜਾਵੇਗਾ। ਇਸ ਟੁੂਰਨਾਮੈਂਟ ‘ਚ 32 ਟੀਮਾਂ ਹਿੱਸਾ ਲੈਣਗੀਆਂ। ਟੂਰਨਾਮੈਂਟ ਦੇ ਸਾਰੇ 64 ਮੈਚਾਂ ਦੀ ਕੁਮੈਂਟਰੀ ਹਿੰਦੀ ਅਤੇ ਅੰਗ਼ਰੇਜ਼ੀ ਦੋਵਾਂ ਭਾਸ਼ਾਵਾਂ ਵਿਚ ਹੋਵੇਗੀ।

ਲੰਡਨ-ਅੰਤਰਰਾਸ਼ਟਰੀ ਫ਼ੁੱਟਬਾਲ ਸੰਸਥਾ ਫ਼ੀਫ਼ਾ ਦੇ ਪ੍ਰਧਾਨ ਸੈਪ ਬਲੈਟਰ ਨੇ ਸੰਕੇਤ ਦਿੱਤੇ ਹਨ ਕਿ 2010 ਵਿਚ ਹੋਣ ਵਾਲੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਰਨ ਦਾ ਮੌਕਾ ਇੰਗਲੈਂਡ ਨੂੰ ਦਿੱਤਾ ਜਾ ਸਕਦਾ ਹੈ। ਇਹ ਵਿਸ਼ਵ ਕੱਪ ਵੈਸੇ ਤਾਂ ਦੱਖਣੀ ਅਫ਼ਰੀਕਾ ਵਿਚ ਹੋਣਾ ਹੈ, ਪਰ ਜੇਕਰ ਉਥੇ ਕੋਈ ਕੁਦਰਤੀ ਆਫ਼ਤ ਆ ਜਾਂਦੀ ਹੈ, ਤਾਂ ਉਸ ਸੂਰਤ-ਏ-ਹਾਲ ਵਿਚ ਵਿਸ਼ਵ ਕੱਪ ਇੰਗਲੈਂਡ ਵਿਖੇ ਤਬਦੀਲ ਕਰ ਦਿੱਤਾ ਜਾਵੇਗਾ। ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਇੰਗਲੈਂਡ ਨੇ 2018 ਦੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਹਾਸਿਲ ਕਰਨ ਦੀਆਂ ਆਪਣੀਆਂ ਤਿਆਰੀਆਂ ਪੂਰੇ ਜ਼ੋਰ-ਸ਼ੋਰ ਨਾਲ ਸ਼ੁਰੂ ਕਰ ਦਿੱਤੀਆਂ ਹਨ।