ਬੀਜਿੰਗ- ਚੀਨ ਵਿਚ ਹਾਲ ਹੀ ਵਿਚ ਹੋਣ ਵਾਲੀਆਂ ਉਲੰਪਿਕ ਖੇਡਾਂ ਦੇ ਮੱਦੇਨਜ਼ਰ ਚੀਨ ਬੁਰੀ ਤਰ੍ਹਾਂ ਡਰ ਗਿਆ ਹੈ। ਇਕ ਪਾਸੇ ਤਾਂ ਸਾਰੇ ਵਿਸ਼ਵ ਦਾ ਮੀਡੀਆ ਉਲੰਪਿਕ ਦੀ ਕਵਰੇਜ਼ ਲਈ ਚੀਨ ਵਿਚ ਮੌਜੂਦ ਹੈ ਅਤੇ ਦੂਜੇ ਪਾਸੇ ਤਿੱਬਤ ਦੇ ਅੰਦੋਲਨ ਕਾਰਨ ਹੁਣ ਚੀਨ ਤਿੱਬਤੀਆਂ ਵਿਰੁੱਧ ਪਹਿਲਾਂ ਵਰਗੀ ਦਮਨਕਾਰੀ ਨੀਤੀ ਨਹੀਂ ਅਪਣਾ ਸਕਦਾ। ਚੀਨ ਨੇ ਨੇਪਾਲ ਨੂੰ ਬੇਨਤੀ ਕਰਕੇ ਮਾਊਂਟ ਐਵਰੈਸਟ ਦਾ ਰਸਤਾ ਵੀ ਬੰਦ ਕਰਵਾ ਦਿੱਤਾ ਹੈ।
 ਦੂਜੇ ਪਾਸੇ ਭਾਰਤ ਵਿਚ ਵੱਸੇ ਤਿੱਬਤੀਆਂ ਨੇ ਵੀ ਵਿਰੋਧ ਪ੍ਰਦਰਸ਼ਨ ਸ਼ੁਰੂ ਕਰ ਦਿੱਤੇ ਹਨ। ਪਰ ਭਾਰਤੀ ਪ੍ਰਸ਼ਾਸਨ ਨੇ 100 ਤੋਂ ਵੱਧ ਪ੍ਰਦਰਸ਼ਨਕਾਰੀਆਂ ਨੂੰ ਹਿਰਾਸਤ ਵਿਚ ਲੈ ਕੇ ਇਹ ਵਿਰੋਧ ਪ੍ਰਦਰਸ਼ਨ ਬੰਦ ਕਰਵਾ ਦਿੱਤਾ ਹੈ।

ਨਵੀਂ ਦਿੱਲੀ - ਪਹਿਲੀ ਵਾਰ ਓਲੰਪਿਕ ਵਿੱਚੋਂ ਬਾਹਰ ਹੋਣ ਦੀ ਤ੍ਰਾਸਦੀ ਝੱਲ ਰਹੀ ਭਾਰਤੀ ਹਾਕੀ ਟੀਮ ਦੇ ਮੁੱਖ ਕੋਚ ਜੋਕਿਮ ਕਾਰਵਾਲਹੋ ਦੇ ਅਹੁਦੇ ‘ਤੇ ਬਣੇ ਰਹਿਣ ਦਾ ਸੰਕੇਤ ਦਿੰਦੇ ਹੋਏ ਭਾਰਤੀ ਹਾਕੀ ਮਹਾਸੰਘ (ਆਈ.ਐੱਚ.ਐੱਫ.) ਨੇ ਸਪਸ਼ੱਟ ਕੀਤਾ ਕਿ ਉਨ੍ਹਾਂ ਦਾ ਅਸਤੀਫਾ ਸਵੀਕਾਰ ਨਹੀਂ ਕੀਤਾ ਜਾਵੇਗਾ। ਕਾਰਵਾਲਹੋ ਨੇ ਭਾਰਤ ਦੇ 80 ਸਾਲਾ ਵਿੱਚ ਪਹਿਲੀ ਵਾਰ ਓਲੰਪਿਕ ਲਈ ਕੁਆਲੀਫਾਈ ਨਾ ਕਰਨ ਤੋਂ ਬਾਅਦ ਅਸਤੀਫਾ ਦੇਣ ਦਾ ਫੈਸਲਾ ਕੀਤਾ ਸੀ। ਪਰ ਭਾਰਤੀ ਹਾਕੀ ਮਹਾਸੰਘ ਦੇ ਪ੍ਰਧਾਨ ਕੇ.ਪੀ.ਐੱਸ. ਗਿੱਲ ਨੇ ਕਿਹਾ ਕਿ ਕੋਚ ‘ਤੇ ਸਾਰਾ ਦੋਸ਼ ਮੜ੍ਹਨਾ ਸਹੀ ਨਹੀਂ ਹੋਵੇਗਾ। ਗਿੱਲ ਨੇ ਇੱਕ ਮੁਲਾਕਾਤ ਵਿੱਚ ਕਿਹਾ ਕਿ ਸਾਨੂੰ ਉਨ੍ਹਾਂ ਦਾ ਅਸਤੀਫਾ ਨਹੀਂ ਮਿਲਿਆ, ਇਸ ਲਈ ਉਸ ਨੂੰ ਸਵੀਕਾਰ ਕਰਨ ਦਾ ਤਾਂ ਸਵਾਲ ਹੀ ਨਹੀਂ ਉੱਠਦਾ। ਉਹ ਹੁਣ ਵੀ ਕੋਚ ਦੇ ਅਹੁਦੇ ‘ਤੇ ਬਰਕਰਾਰ ਹਨ। ਆਈ.ਐੱਚ.ਐੱਫ. ਮੁਖੀ ਨੇ ਕਿਹਾ ਕਿ ਉਨ੍ਹਾਂ ਨੇ 18 ਮਾਰਚ ਨੂੰ ਕਾਰਵਾਲਹੋ ਨੂੰ ਬੈਠਕ ਲਈ ਬੁਲਾਇਆ ਹੈ ਅਤੇ ਉਹ ਦਿਲੀ ਵਿੱਚ ਮਿਲੀ ਹਾਰ ਬਾਰੇ ਵਿਸਥਾਰਪੂਰਵਕ ਚਰਚਾ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਸ ਹਾਰ ਲਈ ਸਿਰਫ ਇੱਕ ਵਿਅਕਤੀ ਨੂੰ ਹੀ ਜਿ਼ੰਮੇਵਾਰ ਠਹਿਰਾਉਣਾ ਉੱਚਿਤ ਨਹੀਂ ਹੈ। ਇਸ ਪਿੱਛੇ ਕਈ ਕਾਰਨ ਹਨ। ਅਸੀਂ ਇਨ੍ਹਾਂ ਦੀ ਚਰਚਾ ਕਰਾਂਗੇ ਅਤੇ ਹਰੇਕ ਚੀਜ਼ਾ ਦਾ ਵਿਸ਼ਲੇਸ਼ਣ ਕਰਾਂਗੇ।