ਸਿਡਨੀ - ਪਾਕਿਸਤਾਨ ਦੇ ਰਾਸ਼ਠਰਪਤੀ ਪ੍ਰਵੇਜ਼ ਮੁਸ਼ੱਰਫ ਅਹੁਦੇ ਤੋਂ ਅਸਤੀਫਾ ਦੇ ਸਕਦੇ ਹਨ। ਉਹ ਪੂਰੀ ਤਰ੍ਹਾਂ ਅਲੱਗ-ਥਲੱਗ ਪੈ ਗਏ ਹਨ। ਯੂਸਫ ਰਜ਼ਾ ਗਿਲਾਨੀ ਨੂੰ ਪ੍ਰਧਾਨ ਮੰਤਰੀ ਅਹੁਦੇ ਦੀ ਸਹੁੰ ਚੁਕਾਏ ਜਾਣ ਦੌਰਾਨ ਮੁਸ਼ੱਰਫ ਦਾ ਵਿਰੋਧ ਪ੍ਰਗਟਾਉਂਦੇ ਹੋਏ ਨਵਾਜ਼ ਸ਼ਰੀਫ ਅਤੇ ਆਸਿਫ ਅਲੀ ਜ਼ਰਦਾਰੀ ਨੇ ਸਹੁੰ ਚੁੱਕ ਸਮਾਰੋਹ ਦਾ ਬਾਈਕਾਟ ਕੀਤਾ ਸੀ। ਨਵੀਂ ਗੱਠਜੋੜ ਸਰਕਾਰ ਦੇ ਕਈ ਸੀਨੀਅਰ ਆਗੂਆਂ ਨੇ ਵੀ ਸਮਾਰੋਹ ਦਾ ਬਾਈਕਾਟ ਕੀਤਾ। ਇਸ ਦੌਰਾਨ ਅਟਾਰਨੀ ਜਨਰਲ ਮਲਿਕ ਮੁਹੰਮਦ ਕਿਊਮ ਨੇ ਕਿਹਾ ਹੈ ਕਿ ਜੱਜਾਂ ਦੀ ਰਿਹਾਈ ਵਿਰੁੱਧ ਮੁਸ਼ੱਰਫ ਸੁਪਰੀਮ ਕੋਰਟ ਨਹੀਂ ਜਾਣਗੇ। ਦੂਜੇ ਪਾਸੇ ਰਾਸ਼ਟਰਪਤੀ ਮੁਸ਼ੱਰਫ ਵੱਲੋਂ ਤਿਆਰ ਕੀਤੀ ਵਿਵਾਦਪੂਰਨ ਸੰਵਿਧਾਨਕ ਸੋਧ ਦਾ ਖਰੜਾ ਤਿਆਰ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਕਾਨੂੰਨੀ ਮਾਹਿਰ ਸ਼ਰੀਫੂਦੀਨ ਪੀਰਜ਼ਾਦਾ ਨੂੰ ਉਨ੍ਹਾਂ ਦੇ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਹੈ। ਪੀਰਜ਼ਾਦਾ ਤੋਂ ਇਲਾਵਾ ਹੋਰ ਸਲਾਹਕਾਰਾਂ ਅਤੇ ਫੌਜੀ ਸ਼ਾਸਨ ਦੇ ਸਹਾਇਕਾਂ ਨੂੰ ਵੀ ਹਟਾ ਦਿੱਤਾ ਗਿਆ ਹੈ। ਮੁਸ਼ੱਰਫ ਦੇ ਬਚੇ ਹੋਏ ਪ੍ਰਮੁੱਖ ਸਹਾਇਕਾਂ ਵਿੱਚ ਹੁਣ ਸਿਰਫ ਅਟਾਰਨੀ ਜਨਰਲ ਮਲਿਕ ਕਿਊਮ, ਕੌਮੀ ਸੁਰੱਖਿਆ ਕੌਂਸਲ ਦੇ ਸਕੱਤਰ ਤਾਰਿਕ ਅਜੀਜ਼ ਅਤੇ ਰਾਸ਼ਟਰਪਤੀ ਦੇ ਬੁਲਾਰੇ ਮੇਜਰ ਜਨਰਲ (ਰਿਟਾ.) ਰਾਸਿ਼ਕ ਕੁਰੈਸ਼ੀ ਸ਼ਾਮਲ ਹਨ।