ਅੰਮ੍ਰਿਤਸਰ- ਸਜ਼ਾ ਪੂਰੀ ਕਰ ਚੁੱਕੇ ਪਾਕਿਸਤਾਨੀ ਕੈਦੀਆਂ ਦੀ ਰਿਹਾਈ ਵਿਚ ਕੇਂਦਰ ਸਰਕਾਰ ਦੀ ਨਾਕਾਮੀ ਅਤੇ ਪਾਕਿ ਸਰਕਾਰ ਦੀ ਬੇਰੁੱਖੀ ਦਾ ਖਮਿਆਜ਼ਾ ਰਾਜ ਸਰਕਾਰ ਨੂੰ ਭੁਗਤਣਾ ਪੈ ਰਿਹਾ ਹੈ। ਜੇਲ੍ਹ ਮੰਤਰੀ ਹੀਰਾ ਸਿੰਘ ਗਾਬੜੀਆ ਦੇ ਮੁਤਾਬਕ ਇਨ੍ਹਾਂ ਕੈਦੀਆਂ ਦੇ ਖਾਤੇ ਵਿਚ ਰਾਜ ਸਰਕਾਰ ਨੂੰ ਹਰ ਮਹੀਨੇ ਤਿੰਨ ਹਜ਼ਾਰ ਰੁਪਏ ਜਮ੍ਹਾ ਕਰਵਾਉਣੇ ਪੈ ਰਹੇ ਹਨ। ਇਸ ਤੋਂ ਇਲਾਵਾ ਉਹਨਾਂ ਦੀ ਰਾਸ਼ਨ ਮਨੀ ਦੇ ਰੂਪ ਵਿਚ ਹਰ ਰੋਜ਼ 72 ਰੁਪਏ ਵੱਖਰੇ ਖਰਚ ਹੋ ਰਹੇ ਹਨ। ਸਜ਼ਾ ਪੂਰੀ ਕਰ ਚੁੱਕੇ ਕੁੱਲ 38 ਪਾਕਿਸਤਾਨੀ ਕੈਦੀ ਇਸ ਵਕਤ ਕੇਂਦਰੀ ਜੇਲ੍ਹ ਗੁਮਟਾਲਾ ਸਮੇਤ ਰਾਜ ਦੀਆਂ ਵੱਖ-ਵੱਖ ਜੇਲ੍ਹਾਂ ਵਿਚ ਬੰਦ ਹਨ। ਇਹਨਾਂ ਵਿਚ ਦੋ ਔਰਤਾਂ ਅਤੇ ਇਕ ਬੱਚਾ ਵੀ ਸ਼ਾਮਲ ਹਨ। ਇਹਨਾਂ ਕੈਦੀਆਂ ਦੀ ਸਜ਼ਾ ਸੰਨ 2004 ਵਿਚ ਪੂਰੀ ਹੋ ਚੁੱਕੀ ਹੈ। ਇਹਨਾਂ ਨੂੰ ਹਾਈ ਕੋਰਟ ਦੇ ਆਦੇਸ਼ ਮੁਤਾਬਕ ਪੰਜ ਲੱਖ ਰੁਪਏ ਮੁਆਵਜ਼ਾ ਹਾਸਲ ਹੋ ਜਾਵੇਗਾ। ਬਾਕੀ 30 ਕੈਦੀਆਂ ਦੀ ਰਾਸ਼ੀ ਉਹਨਾਂ ਦੇ ਜੇਲ੍ਹ ਵਿਚ ਨਜਾਇਜ਼ ਤੌਰ ‘ਤੇ ਰਹਿਣ ਦੇ ਆਧਾਰ ‘ਤੇ ਤਹਿ ਹੋਵੇਗੀ। ਗੁਮਟਾਲਾ ਜੇਲ੍ਹ ਦੇ ਸੁਪਰਡੈਂਟ ਕੈਪਟਨ ਐਸ. ਪੀ. ਸਿੰਘ ਦਾ ਕਹਿਣਾ ਹੈ ਕਿ ਹਰੇਕ ਮਾਸਿਕ ਰਿਪੋਰਟ ਵਿਚ ਇਸ ਕਿਸਮ ਦੇ ਮਾਮਲਿਆਂ ਦੀ ਜਾਣਕਾਰੀ ਭੇਜੀ ਜਾਂਦੀ ਹੈ। ਜੇਲ੍ਹ ਮੰਤਰੀ ਗਾਬੜੀਆ ਨੇ ਦੱਸਿਆ ਕਿ ਹਰ ਮਹੀਨੇ ਰਾਜ ਸਰਕਾਰ ਨੂੰ ਪਾਕਿਸਤਾਨੀ ਕੈਦੀਆਂ ‘ਤੇ ਲੱਖਾਂ ਰੁਪਏ ਫਾਲਤੂ ਖਰਚ ਕਰਨੇ ਪੈ ਰਹੇ ਹਨ।

 ਕਰਤਾਰਪੁਰ ਸਾਹਿਬ ਮਾਰਗ ਖੋਲਣ ਲਈ ਹਿੰਦੋਸਤਾਨ ਦੀ ਸਰਕਾਰ ਵਲੌ ਹਾਂ ਪੱਖੀ ਹੁੰਗਾਰਾ”

ਭਾਰਤ ਦੇ ਡੇਰਾ ਬਾਬਾ ਨਾਨਕ ਅਤੇ ਪਾਕਿਸਤਾਨ ਦੇ ਸ੍ਰੀ ਕਰਤਾਰਪੁਰ ਸਾਹਿਬ ਵਿਚਕਾਰ ਸਾਂਝਾ ਕੋਰੀਡੋਰ ਜਲਦ ਹੀ ਬਣੇਗਾ। ਇਹ ਖੁਲਾਸਾ ਭਾਰਤ ਦੇ ਵਿਦੇਸ ਮੰਤਰੀ ਪ੍ਰਣਾਬ ਮੁਖਰਜੀ ਨੇ ਡੇਰਾ ਬਾਬਾ ਨਾਨਕ ਦੇ ਦੌਰੇ ਦੌਰਾਨ ਕੀਤਾ ।  ਉਨਾਂ ਦੱਸਿਆ ਕਿ ਉਕਤ ਇਤਿਹਾਸਕ ਅਤੇ ਧਾਰਮਿਕ ਮਹੱਤਤਾ ਵਾਲੇ ਦੋਹਾਂ ਸਹਿਰਾਂ ‘ਚ ਕੋਰੀਡੋਰ ਬਣਾਉਣ ਲਈ ਭਾਰਤੀ ਮਾਹਿਰਾਂ ਅਤੇ ਅਧਕਾਰੀਆਂ ਦੀ ਇੱਕ ਟੀਮ ਜਲਦੀ ਹੀ ਪਾਕਿਸਤਾਨ ਜਾਵੇਗੀ ਜੋ ਕੋਰੀਡੋਰ ਦੀ ਉਸਾਰੀ ਬਾਰੇ ਆਧਿਐਨ ਕਰੇਗੀ। ਉਨਾ ਕਿਹਾ ਕਿ ਭਾਰਤ ਸਰਕਾਰ ਸਿੱਖ ਭਾਈਚਾਰੇ ਵੱਲੋਂ ਕੀਤੀ ਜਾ ਰਹੀ ਮੰਗ ਦੀ ਭਾਵਨਾ ਤੋਂ ਚੰਗੀ ਤਰ੍ਹਾਂ ਵਾਕਫ ਹੈ ਅਤੇ ਉਹਨਾਂ ਪਹਿਲਾਂ ਵੀ ਇਹ ਮਾਮਲਾ ਵਿਸਥਾਰ ਰੂਪ ਵਿੱਚ ਪਾਕਿਸਤਾਨ ਦੇ ਵਿਦੇਸ ਮੰਤਰੀ ਦੇ ਧਿਆਨ ਵਿੱਚ ਲਿਆਂਦਾ ਹੈ।

  ਮੁਕਤਸਰ, 28 ਜੂਨ (ਜਤਿਨ ਕੰਬੋਜ): ਸ੍ਰ. ਸੁਖਬੀਰ ਸਿੰਘ ਬਾਦਲ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ ਅਤੇ ਮੈਂਬਰ ਪਾਰਲੀਮੇਂਟ  ਨੇ ਅੱਜ ਮੁਕਤਸਰ  ਤੋਂ 20 ਕਿਲੋਮੀਟਰ  ਦੂਰ ਪਿੰਡ ਬਾਜਾ ਮਰਾੜ ਵਿਖੇ ਪੰਜਾਬ ਰਾਜ ਬਿਜਲੀ  ਬੋਰਡ ਵਲੋਂ 3 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲ 66 ਕੇ .ਵੀ. ਬਿਜਲੀ ਘਰ ਦਾ ਨੀਂਹ ਪੱਥਰ  ਰੱਖਣ ਤੋਂ ਬਾਅਦ ਇਕ ਪ੍ਰੈਸ ਕਾਨਫਰੰਸ  ਦੌਰਾਨ  ਪੱਤਰਕਾਰਾਂ ਵਲੋਂ ਪੁੱਛੇ ਸਵਾਲਾਂ ਦਾ ਜਵਾਬ ਦਿੰਦਿਆਂ  ਸਪੱਸ਼ਟ ਕੀਤਾ ਕਿ ਸ਼੍ਰੋਮਣੀ ਅਕਾਲੀ ਦਲ  ਲੋਕ ਸਭਾ ਚੋਣਾਂ ਦਾ ਐਲਾਨ ਹੋਣ ਤੋਂ ਬਾਅਦ ਹੀ  ਆਪਣੇ ਉਮੀਦਵਾਰਾਂ ਦੀ ਸੂਚੀ ਜਾਰੀ ਕਰੇਗਾ। ਉਨ  ਕਿਹਾ ਕਿ  ਆ ਰਹੀਆਂ ਲੋਕ ਸਭਾ ਚੋਣਾਂ ਸ਼੍ਰੋਮਣੀ ਅਕਾਲੀ ਦਲ ਅਤੇ ਭਾਜਪਾ ਵਲੋਂ ਇਕੱਠਿਆਂ ਮਿਲ ਕੇ ਲੜੀਆਂ ਜਾਣਗੀਆਂ। ਲੋਕ ਸਭਾ ਚੋਣਾਂ ਦੌਰਾਨ ਮੁੱਦਿਆਂ ਸਬੰਧੀ ਪੁੱਛੇ ਗਏ ਸਵਾਲ ਦਾ ਜਵਾਬ ਦਿੰਦਿਆਂ ਸ੍ਰੀ ਬਾਦਲ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਸ਼੍ਰੋਮਣੀ ਅਕਾਲੀ ਦਲ  ਮਹਿੰਗਾਈ ਅਤੇ ਵਿਕਾਸ ਦੇ ਮੁੱਦਿਆਂ  ਨੂੰ ਲੈ ਕੇ  ਚੋਣਾਂ ਲੜੇਗਾ ਅਤੇ ਪੰਜਾਬ ਦੀਆਂ ਸਾਰੀਆਂ ਦੀਆਂ ਸਾਰੀਆਂ 13 ਸੀਟਾਂ ’ਤੇ ਜਿੱਤ ਪ੍ਰਾਪਤ ਕਰੇਗਾ।