ਇਹ ਅਜੀਬ ਸਥਿਤੀ ਅੱਜ ਦਾ ਸੱਚ ਬਣਦੀ ਜਾ ਰਹੀ ਹੈ। ਸਾਡੇ ਦੇਸ਼ ਵਿਚ ਪਾਣੀ ਦੀ ਕਿੱਲਤ ਬੇਮੁਹਾਰੀ ਵੱਧ ਰਹੀ ਹੈ। ਫਸਲਾਂ ਲਈ ਅਸੀਂ ਜੋ 170 ਲੀਟਰ ਪਾਣੀ ਕੱਢਦੇ ਹਾਂ ਉਸ ਵਿਚੋਂ ਸਿਰਫ 100 ਲੀਟਰ ਪਾਣੀ ਹੀ ਵਾਪਸ ਧਰਤੀ ਵਿਚ ਪਹੁੰਚਦਾ ਹੈ। ਜਿਸ ਤਰ੍ਹਾਂ ਦੇ ਹਾਲਾਤ ਚਲ ਰਹੇ ਹਨ, ਉਸਨੂੰ ਦੇਖਦੇ ਹੋਏ ਇਹ ਕੋਈ ਅਣਹੋਣੀ ਨਹੀਂ ਹੋਵੇਗੀ ਕਿ ਅਗਲੀ ਵਿਸ਼ਵ ਜੰਗ ਪਾਣੀ ਲਈ ਲੜੀ ਜਾਵੇਗੀ। ਦੁਨੀਆਂ ਦੇ ਦੂਜੇ ਦੇਸ਼ ਵੀ ਇਸ ਪਾਣੀ ਦੀ ਕਿੱਲਤ ਤੋਂ ਮੁਕਤ ਨਹੀਂ ਹਨ। ਯਮਨ, ਇਰਾਨ, ਅਫਗਾਨਿਸਤਾਨ, ਮਿਸਰ ਆਦਿ ਬੰਜਰ ਹੁੰਦੇ ਜਾ ਰਹੇ ਹਨ। ਅਮਰੀਕਾ ਦੇ ਮੱਧ ਪੂਰਬੀ ਖੇਤਰ ਤਾਂ ਪਾਣੀ ਦੀ ਘਾਟ ਵਿਚ ਹੀ ਹਨ। ਅੱਜ ਅਮਰੀਕਾ ਵੀ ਪਾਣੀ  ਕੈਨੇਡਾ ਤੋਂ ਲੈ ਰਿਹਾ ਹੈ। ਇਕ ਦਿਨ ਆਵੇਗਾ ਕਿ ਮਨੁੱਖ ਆਪਣੀਆਂ ਆਉਣ ਵਾਲੀਆਂ ਨਸਲਾਂ ਨੂੰ ਪਾਣੀ ਰਹਿਤ ਕਰ ਦੇਵੇਗਾ। ਅੱਜ ਸਭ ਤੋਂ ਵੱਡੀ ਲੋੜ ਸਾਨੂੰ ਆਪਣੇ ਪਾਣੀ ਤੇ ਖੇਤੀ ਪ੍ਰਬੰਧਾਂ ਨੂੰ ਸੁਧਾਰਨ ਦੀ ਹੈ। ਅੱਜ ਦੇਸ਼ ਦੀਆਂ 31 ਖੇਤੀਵਰਸਿਟੀਆਂ ਇਸ ਕਾਰਜ ਵਿਚ ਫੇਲ੍ਹ ਹਨ। ਆਮ ਲੋਕਾਂ ਦੀ ਸੂਝਬੂਝ ਨੂੰ ਅੱਖੋਂ ਓਹਲੇ ਕਰਕੇ ਰਟੇ ਰਟਾਏ ਫੈਸਲੇ ਹੀ ਕੀਤੇ ਜਾ ਰਹੇ ਹਨ। ਬੀ•ਟੀ• ਦੀ ਖੇਤੀ ਪਾਣੀ ਦੀ ਲੋੜ ਵਧਾਉਂਦੀ ਹੈ। ਇਸੇ ਕਰਕੇ ਕੀੜੇ ਵਧਦੇ ਹਨ। ਝੋਨੇ ਲਗਾਉਣ ਦੀਆਂ ਨਵੀਆਂ ਤਕਨੀਕਾਂ ਕਿਸਾਨਾਂ ਕੋਲੋਂ ਲੈਕੇ, ਇਹ ਯੂਨੀਵਰਸਿਟੀਆਂ ਅੱਗੇ ਖੋਜ ਨਹੀਂ ਕਰ ਰਹੀਆਂ ਹੈ। ਕਿਤੇ ਇੰਜ ਨਾ ਹੋ ਜਾਵੇ: ਕਿਸੇ ਨੇ ਰਾਣੀ ਨੂੰ ਦੱਸਿਆ ਕਿ ਇਹ ਲੋਕ ਗਰੀਬ ਹਨ ਇਸ ਲਈ ਇਹ ਰੋਟੀ ਨਹੀਂ ਖਾ ਸਕਦੇ। ਰਾਣੀ ਨੇ ਹੁਕਮ ਦਿੱਤਾ ਕਿ ਜੇ ਇਹ ਰੋਟੀ ਨਹੀਂ ਖਾਂਦੇ ਤਾਂ ਇਹਨਾਂ ਨੂੰ ਡਬਲ ਰੋਟੀ ਦੇ ਦੇਵੋ। ਇੰਜ ਹੀ ਲੱਗਦਾ ਹੈ ਕਿ ਕਿਸੇ ਦਿਨ ਕੋਈ ਵੱਡਾ ਵਿਗਿਆਨੀ ਆਖੇਗਾ। ਜੇ ਪਾਣੀ ਘੱਟ ਹੈ ਤਾਂ ਨਹਿਰਾਂ ਨਲਕਿਆਂ ਨਾਲ ਭਰ ਲਵੋ। ਬਸ ਫੇਰ•••••
– ਜਨਮੇਜਾ ਸਿੰਘ ਜੌਹਲ
98159–45018