ਨਿਊਯਾਰਕ- ਗਲੋਬਲ ਵਾਰਮਿੰਗ ਦੀ ਸਮੱਸਿਆ ਤੋਂ ਅਗਲੇ 10 ਸਾਲ ਤੱਕ ਨਿਜਾਤ ਮਿਲਣ ਵਾਲੀ ਹੈ। ਜਰਮਨੀ ਦੇ ਜਲਵਾਯੂ ਖੋਜਕਾਰਾਂ ਦੀ ਇਕ ਟੀਮ ਨੇ ਹਾਲ ਹੀ ਵਿਚ ਆਪਣੀ ਖੋਜ ਰਾਹੀਂ ਇਹ ਨਤੀਜਾ ਕੱਢਿਆ ਹੈ। ਟੀਮ ਦਾ ਮੰਨਣਾ ਹੈ ਕਿ ਦੁਨੀਆਂ ਦਾ ਤਾਪਮਾਨ ਔਸਤ ਤੋਂ ਜ਼ਿਆਦਾ ਰਹੇਗਾ ਪਰ ਇਸ ਦਹਾਕੇ ਦੇ ਸ਼ੁਰੂਆਤੀ ਸੱਤ ਸਾਲ ਤੱਕ ਵਾਰਮਿੰਗ ਨਹੀਂ ਹੋਵੇਗੀ। ਇਹ ਪ੍ਰਕਿਰਿਆ ਦਸ ਸਾਲ ਤੱਕ ਜਾਰੀ ਰਹਿ ਸਕਦੀ ਹੈ। ਵਾਤਾਵਰਣ ‘ਤੇ ਕੇਂਦਰਿਤ ਅੰਤਰ-ਰਾਸ਼ਟਰੀ ਮੈਗਜ਼ੀਨ 'ਨੇਚਰ‘ ਦੇ ਤਾਜ਼ਾ ਅੰਕ ਵਿਚ ਇਸ ਪਰਚੇ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਟੀਮ ਦਾ ਅਨੁਮਾਨ ਹੈ ਕਿ ਮਹਾਸਾਗਰਾਂ ਵਿਚ ਹੋਣ ਵਾਲੇ ਸੰਚਾਰ (ਸਰਕੂਲੇਸ਼ਨ) ਵਿਚ ਕੁਦਰਤੀ ਤਬਦੀਲੀ ਹੋਵੇਗੀ, ਜਿਸ ਕਰਕੇ ਤਾਪਮਾਨ ‘ਤੇ ਅਸਰ ਪਵੇਗਾ ਜੋ ਅਸਥਾਈ ਤੌਰ ‘ਤੇ ਗ੍ਰੀਨ ਹਾਊਸ ਗੈਸਾਂ ਦੀ ਨਿਕਾਸੀ ਦਾ ਮੁਕਾਬਲਾ ਕਰੇਗਾ। ਜਰਮਨ ਖੋਜਕਾਰਾਂ ਦੀ ਇਹ ਕੋਸ਼ਿਸ਼ ਸਦੀ ਦੀ ਬਜਾਏ ਦਹਾਕੇ ਦੇ ਦੌਰਾਨ ਮੌਸਮ ਦੇ ਹਾਲ ਦੀ ਭਵਿੱਖਬਾਣੀ ਦੀ ਪਹਿਲੀ ਵਾਰ ਪ੍ਰਸਾਰਿਤ ਸੂਚਨਾ ਹੈ। ਪ੍ਰਿਸਟਨ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਦੀ ਟੀਮ ਡੈਲਵਰਥ ਨੇ ਹਾਲਾਂਕਿ ਇਸ ਅਨੁਮਾਨ ਨੂੰ ਸ਼ੱਕੀ ਦੱਸਦੇ ਹੋਏ ਚੌਕਸ ਕੀਤਾ ਹੈ। ਥੋੜ੍ਹਚਿਰੇ ਅਤੇ ਲੰਮੇਰੀਆਂ ਭਵਿੱਖਬਾਣੀਆਂ ਦੇ ਲਈ ਇਕ ਹੀ ਕਿਸਮ ਦੇ ਕੰਪਿਊਟਰ ਮਾਡਲ ਦਾ ਇਯਤੇਮਾਲ ਕੀਤਾ ਗਿਆ ਹੈ।

ਨਿਊਯਾਰਕ- ਸੌਰ ਮੰਡਲ ਵਿਚ ਮੌਜੂਦ ਸ਼ਨੀ ਅਤੇ ਬ੍ਰਹਿਸਪਤੀ ਗ੍ਰਹਿਆਂ ਦੇ ਕੋਲ ਕਈ-ਕਈ ਚੰਦਰਮਾ ਹਨ, ਜਦਕਿ ਧਰਤੀ ਦੇ ਕੋਲ ਇਕ ਹੀ ਚੰਦਰਮਾ ਹੈ। ਇਕਲੌਤਾ ਚੰਦਰਮਾ ਪੁਲਾੜ ਸਥਿਤ ਆਪਣੇ ਪੰਥ ਵਿਚ ਧਰਤੀ ਦੀ ਪਰਕਰਮਾ ਕਰਦਾ ਰਹਿੰਦਾ ਹੈ, ਪਰ ਚੰਨ ‘ਤੇ ਹਰ ਮਹੀਨੇ ਕਈ ਅਜਿਹੀਆਂ ਘਟਨਾਵਾਂ ਹੁੰਦੀਆਂ ਹਨ ਜੋ ਮਨੁੱਖੀ ਕਲਪਨਾ ਤੋਂ ਪਰੇ ਹੁੰਦੀਆਂ ਹਨ। ਪੂਰੇ ਚੰਦਰਮਾ ਨੂੰ ਜੇਕਰ ਦੇਖਿਆ ਜਾਵੇ ਤਾਂ ਸਾਨੂੰ ਕਿਤੇ ਪ੍ਰਾਚੀਨ ਜਵਾਲਾਮੁਖੀ ਦੇ ਕ੍ਰੇਟਰ (ਮੂੰਹ) ਅਤੇ ਉਹਨਾਂ ਤੋਂ ਨਿਕਲਿਆ ਜਮਿਆ ਪਿਆ ਲਾਵਾ ਸ਼ਾਂਤ ਅਵਸਥਾ ਵਿਚ ਦਿਖਾਈ ਦੇਵੇਗਾ, ਉਥੇ ਹੀ ਹਵਾ ਰਹਿਤ ਵਾਤਾਵਰਣ ਵੀ ਮੌਜੂਦ ਹੈ। ਸਾਨੂੰ ਇਹ ਸਭ ਦਿਖਾਈ ਦਿੰਦਾ ਹੈ ਪਰ ਇੱਥੇ ਕੁਝ ਵੀ ਠੀਕ ਨਹੀਂ ਹੈ। ਨਾਸਾ ਦੇ ਵਿਗਿਆਨੀਆਂ ਨੇ ਇਹ ਦਾਅਵਾ ਕੀਤਾ ਹੈ ਕਿ ਇੱਥੇ ਹਰ ਮਹੀਨੇ ਉਦੋਂ ਅਜੀਬੋ-ਗਰੀਬ ਘਟਨਾਵਾਂ ਹੁੰਦੀਆਂ ਹਨ, ਜਦੋਂ ਚੰਦਰਮਾ ਧਰਤੀ ਦੀ ਟੇਲ (ਪੂਛ) ਦੇ ਨਜ਼ਦੀਕ ਆਉਂਦਾ ਹੈ। ਇਸ ਦੌਰਾਨ ਧਰਤੀ ਦੀ ਟੇਲ ਦੇ ਚੁੰਬਕੀ ਪ੍ਰਭਾਵ ਦੇ ਕਾਰਨ ਚੰਦਰਮਾ ‘ਤੇ ਹੈਰਾਨੀਜਨਕ ਘਟਨਾਵਾਂ ਹੁੰਦੀਆਂ ਹਨ। ਨਾਸਾ ਦੇ ਵਿਗਿਆਨੀਆਂ ਮੁਤਾਬਕ ਅਜਿਹੀਆਂ ਘਟਨਾਵਾਂ ਹਰੇਕ ਮਹੀਨੇ ਹੁੰਦੀਆਂ ਹਨ। ਪੁਲਾੜ ਵਿਚ ਘੁੰਮਦੇ ਵਕਤ ਧਰਤੀ ਦੇ ਚੁੰਬਕੀ ਪ੍ਰਭਾਵ ਵਿਚ ਚੰਦਰਮਾ ਹਰ ਮਹੀਨੇ ਇਕ ਵਾਰ ਜ਼ਰੂਰ ਆਉਂਦਾ ਹੈ, ਜਿਸ ਕਾਰਨ ਚੰਦਰਮਾ ‘ਤੇ ਤੂਫਾਨ ਹੀ ਆ ਜਾਂਦਾ ਹੈ। ਇਹ ਤੂਫਾਨ ਛੱਡੇ ਕਣਾਂ ਦੇ ਤਿਆਗ ਦੇ ਕਾਰਨ ਪੈਦਾ ਹੁੰਦਾ ਹੈ। ਵਿਗਿਆਨੀਆਂ ਮੁਤਾਬਕ ਇਹ ਕੋਈ ਵੀ ਦੱਸ ਸਕਦਾ ਹੈ ਕਿ ਕਦੋਂ ਚੰਦਰਮਾ ਧਰਤੀ ਦੀ ਟੇਲ ਦੇ ਸੰਪਰਕ ਵਿਚ ਆਵੇਗਾ।

ਲੰਡਨ- ਜਿਸ ਤਰ੍ਹਾਂ ਬਾਰਡਰ ਦੀ ਰੱਖਿਆ ਦੇ ਲਈ ਸੈਨਿਕ ਚੌਕਸੀ ਕਰਦੇ ਹੋਏ ਰੇਡੀਓ ਤੰਤਰ ਦੇ ਜ਼ਰੀਏ ਸਭ ਕੁਝ ਠੀਕ-ਠਾਕ ਹੋਣ ਦੇ ਸੰਦੇਸ਼ੇ ਅਧਿਕਾਰੀਆਂ ਤੱਕ ਪਹੁੰਚਾਉਂਦੇ ਰਹਿੰਦੇ ਹਨ, ਠੀਕ ਉਸੇ ਤਰ੍ਹਾਂ ਹੀ ਪੰਛੀ ਵੀ ਆਪਣੇ ਸਾਥੀਆਂ ਨੂੰ ਚੌਕਸ ਕਰਨ ਦੇ ਲਈ ਵਿਸ਼ੇਸ਼ ਆਵਾਜ਼ ਕੱਢਦੇ ਹਨ। ਬ੍ਰਿਸਟਲ ਯੂਨੀਵਰਸਿਟੀ ਦੇ ਖੋਜਕਾਰਾਂ ਦੁਆਰਾ ਕੀਤੇ ਗਏ ਅਧਿਐਨ ਤੋਂ ਇਹ ਗੱਲ ਪਤਾ ਲੱਗੀ ਹੈ ਕਿ ਚਿੜੀਆਂ ਖ਼ਤਰਾ ਦੇਖ ਕੇ ਇਕ ਵਿਸ਼ੇਸ਼ ਗੀਤ ਗਾਉਂਦੀਆਂ ਹਨ ਤਾਂ ਜੋ ਦੋਸਤ ਮੁਸੀਬਤ ਦੀ ਸ਼ੰਕਾ ਨੂੰ ਦੇਖਦੇ ਹੋਏ ਜ਼ਿਆਦਾ ਦਾਣਾ-ਪਾਣੀ ਪ੍ਰਾਪਤ ਕਰ ਲੈਣ। ਮੁੱਖ ਖੋਜਕਾਰਾਂ ਐਂਡੀ ਰੈਡਫੋਰਡ ਨੇ ਕਿਹਾ ਕਿ ਇਹ ਆਪਸੀ ਸਹਿਯੋਗ ਦੀ ਅਦਭੁਤ ਉਦਾਹਰਣ ਹੈ। ਉਹਨਾਂ ਨੇ ਦੱਸਿਆ ਕਿ ਅਧਿਐਨ ਦੇ ਦੌਰਾਨ ਜਦੋਂ ਉਸ ਗੀਤ ਦੀ ਰਿਕਾਰਡਿੰਗ ਵਜਾਈ ਗਈ ਤਾਂ ਪਾਇਆ ਗਿਆ ਕਿ ਪੰਛੀ ਤੁਰੰਤ ਹਰਕਤ ਵਿਚ ਆਏ ਅਤੇ ਬਿਨਾਂ ਖ਼ਤਰੇ ਨੂੰ ਜਾਣੇ ਦਾਣਾ-ਪਾਣੀ ਬਟੋਰਨ ਵਿਚ ਲੱਗ ਗਏ।
 ਇਹ ਅਧਿਐਨ ਦੱਖਣੀ ਅਫਰੀਕਾ ਵਿਚ ਪਾਈ ਜਾਣ ਵਾਲੀ 'ਪੀਡ ਬਬਲਰ‘ ਨਾਮੀ ਪ੍ਰਜਾਤੀ ਦੀਆਂ ਚਿੜੀਆਂ ‘ਤੇ ਕੀਤਾ ਗਿਆ। ਇਹ ਛੇ ਜਾਂ ਸੱਤ ਦੇ ਗਰੁੱਪ ਵਿਚ ਰਹਿੰਦੀਆਂ ਹਨ ਅਤੇ ਵਾਰੀ ਵਾਰੀ ਚੌਂਕੀਦਾਰ ਦੀ ਭੂਮਿਕਾ ਨਿਭਾਉਂਦੀਆਂ ਹਨ। ਇਸ ਅਧਿਐਨ ਦੇ ਨਤੀਜੇ ਜਰਨਲ 'ਕਰੰਟ ਬਾਇਓਲਾਜੀ‘ ਅਤੇ 'ਸੇਲ‘ ਦੇ ਤਾਜ਼ਾ ਅੰਕ ਵਿਚ ਪ੍ਰਕਾਸ਼ਿਤ ਹੋਏ ਹਨ। ਕੁਝ ਦਿਨ ਪਹਿਲਾਂ ਆਏ ਇਕ ਅਧਿਐਨ ਵਿਚ ਕਿਹਾ ਗਿਆ ਸੀ ਕਿ ਬਾਂਦਰ ਬੋਲਦੇ ਹਨ, ਆਪਣੀ ਭਾਸ਼ਾ ਦੇ ਅਨੋਖੇ ਸੰਕੇਤਾਂ ਨਾਲ ਉਹ ਸਾਥੀਆਂ ਨਾਲ ਗੱਲ ਕਰਦੇ ਹਨ।