ਇਸਲਾਮਾਬਾਦ – ਪਾਕਿਸਤਾਨ ਦੀ ਸਾਬਕਾ ਪ੍ਰਧਾਨ ਮੰਤਰੀ ਬੇਨਜੀਰ ਭੁੱਟੋ ਦੀ ਹੱਤਿਆ ਬਾਰੇ ਜਾਂਚ ਤੋਂ ਸਰਕਾਰ ਦੂਰ ਹੁੰਦੀ ਜਾਪਦੀ ਹੈ। ਬੇਨਜੀਰ ਭੁੱਟੋ ਦੀ ਅੱਤਵਾਦੀ ਹਮਲੇ ਵਿੱਚ ਕੀਤੀ ਗਈ ਹੱਤਿਆ ਦੀ ਜਾਂਚ ਕਰਨ ਆਈ ਸਕਾਟਲੈਂਡ ਯਾਰਡ ਦੀ ਟੀਮ ਨੂੰ 18 ਮਹੱਤਵਪੂਰਨ ਸੁਰਾਗ ਅਤੇ ਸਬੂਤ ਮਿਲੇ ਹਨ। ਦੇਸ਼ ਦੀ ਕਾਰਜਵਾਹਕ ਸਰਕਾਰ ਵਿੱਚ ਗ੍ਰਹਿ ਮੰਤਰੀ ਹਾਮਿਦ ਨਵਾਜ਼ ਨੇ ਜ਼ੀਓ ਟੀ.ਵੀ. ਨੂੰ ਇੱਕ ਵਿਸ਼ੇਸ਼ ਇੰਟਰਵਿਊ ਵਿੱਚ ਇਹ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਪ੍ਰਾਪਤ ਸਬੂਤਾਂ ਅਨੁਸਾਰ ਭੁੱਟੋ ਦੀ ਹੱਤਿਆ ਵਿੱਚ ਤਾਲਿਬਾਨ ਕਮਾਂਡਰ ਬੈਤੂੱਲਾ ਮਹਿਸੂਦ ਦੇ ਸ਼ਾਮਲ ਹੋਣ ਦੇ ਸੰਕੇਤ ਹਨ ਅਤੇ ਇਸੇ ਆਧਾਰ ‘ਤੇ ਉਸ ਵਿਰੁੱਧ ਮੁਹਿੰਮ ਛੇੜੀ ਗਈ ਹੈ। ਨਵਾਜ਼ ਨੇ ਕਿਹਾ ਕਿ ਸਵਾਤ ਘਾਟੀ ਅਤੇ ਹੋਰ ਸੰਵੇਦਨਸ਼ੀਲ ਇਲਾਕਿਆਂ ਵਿੱਚ ਸਥਾਨਕ ਤਾਲਿਬਾਨ ਗੁੱਟਾਂ ਨੂੰ ਕਾਬੂ ਕੀਤਾ ਜਾ ਚੁੱਕਾ ਹੈ। ਹੁਣ ਸਿਰਫ ਕੁਝ ਹੀ ਗਰੁੱਪ ਸਰਗਰਮ ਹਨ। ਉਨ੍ਹਾਂ ਕਿਹਾ ਕਿ ਦੇਸ਼ ਦੇ ਪ੍ਰਮਾਣੂ ਹਥਿਆਰ ਪੂਰੀ ਤਰ੍ਹਾਂ ਸੁਰੱਖਿਅਤ ਹੱਥਾਂ ਵਿੱਚ ਹਨ। ਉਨ੍ਹਾਂ ਨੂੰ ਕਿਸੇ ਤਰ੍ਹਾਂ ਦਾ ਖਤਰਾ ਨਹੀਂ ਹੈ। ਗ੍ਰਹਿ ਮੰਤਰੀ ਨੇ ਕਿਹਾ ਕਿ 18 ਫਰਵਰੀ ਨੂੰ ਹੋਣ ਵਾਲੀਆਂ ਚੋਣਾਂ ਲਈ ਸੁਰੱਖਿਆ ਦੇ ਪੁਖਤਾ ਇੰਤਜ਼ਾਮ ਹਨ ਅਤੇ ਹੋਰ ਸੁਰੱਖਿਆ ਬਲਲਾਂ ਨੂੰ ਸਹਾਇਤਾ ਲਈ ਬੁਲਾਇਆ ਜਾਵੇਗਾ।