ਹਾਲੀਵੁੱਡ - ਉਮੀਦ ਦੇ ਮੁਤਾਬਕ ਹੀ ਇੱਥੇ ਆਸਕਰ ਐਵਾਰਡ ਦਿੱਤੇ ਜਾਣ ਵਾਲੇ ਸਥਾਨ ਉੱਤੇ ਬਰਾਕ ਓਬਾਮਾ ਅਤੇ ਹਿਲੇਰੀ ਕਲਿੰਟਨ ਵਿਚਾਲੇ ਹੋਏ ਬਹਿਸ ਹਾਲੀਵੁੱਡ ਫਿਲਮ ਦੀ ਕਿਸੇ ਕਹਾਣੀ ਵਾਂਗ ਹੀ ਖਤਮ ਹੋਈ ਅਤੇ ਜਿੱਤ ਆਖਰ ਡੈਮੋਕ੍ਰੇਟਿਕ ਏਕਤਾ ਦੀ ਹੀ ਹੋਈ। ਅਗਲੇ ਹਫਤੇ ਮੰਗਲਵਾਰ ਨੂੰ ਪੈ ਰਹੀਆਂ ਵੋਟਾਂ ਤੋਂ ਪਹਿਲਾਂ ਦੋਵਾਂ ਡੈਮੋਕ੍ਰੇਟਿਕ ਉਮੀਦਵਾਰਾਂ ਨੇ ਵ੍ਹਾਈਟ ਹਾਊਸ ਤੱਕ ਪਹੁੰਚਣ ਲਈ ਭਖਵੀਂ ਬਹਿਸ ਕੀਤੀ। ਇਲੀਨੋਇਸ ਦੇ ਸੈਨੇਟਰ ਅਤੇ ਅਮਰੀਕਾ ਦੀ ਸਾਬਕਾ ਪ੍ਰਥਮ ਮਹਿਲਾ ਵਿਚਾਲੇ ਨੀਤੀਆਂ ਦੇ ਮਤਭੇਦ ਉੱਤੇ ਭਖਵੀਂ ਬਹਿਸ ਹੋਈ। ਇਸ ਵਾਰ ਉਨ੍ਹਾਂ ਦੀ ਬਹਿਸ ਵਿੱਚ ਉਸ ਪ੍ਰਕਾਰ ਦੀ ਕੁੜੱਤਣ ਨਹੀਂ ਸੀ ਜਿਸ ਤਰ੍ਹਾਂ ਦੀ ਦੱਖਣੀ ਕਰੋਲੀਨਾ ਵਿੱਚ ਬਹਿਸ ਦੌਰਾਨ ਦੇਖਣ ਨੂੰ ਮਿਲੀ ਸੀ। ਬਹਿਸ ਮਗਰੋਂ ਹਿਲੇਰੀ ਕਲਿੰਟਨ ਨੇ ਕਿਹਾ ਕਿ ਚਾਹੇ ਉਸ ਦੇ ਅਤੇ ਓਬਾਮਾ ਦੇ ਸਿਹਤ ਸੰਭਾਲ, ਆਰਥਿਕ ਸੁਧਾਰਾਂ ਅਤੇ ਵਿਦੇਸ਼ੀ ਜ਼ਾਲਮ ਰਾਜਾਂ ਨੂੰ ਕਾਬੂ ਵਿੱਚ ਕਰਨ ਵਰਗੇ ਮਸਲਿਆਂ ਉੱਤੇ ਮਤਭੇਦ ਸਨ ਲੇਕਿਨ ਉਹ ਦੋਵੇਂ ਇਸ ਗੱਲ ਉੱਤੇ ਸਹਿਮਤ ਸਨ ਕਿ ਰਿਪਬਲੀਕਨਾਂ ਨੂੰ ਸੱਤਾ ਤੋਂ ਲਾਂਭੇ ਕਰਨਾ ਜਰੂਰੀ ਹੈ।