USAਵਾਸਿ਼ੰਗਟਨ - ਅਲ ਕਾਇਦਾ ਅਤੇ ਤਾਲਿਬਾਨੀ ਅਨਸਰ ਪਾਕਿਸਤਾਨੀ ਕਬਾਇਲੀ ਇਲਾਕੇ ਤੋਂ ਅੱਗੇ ਵਧ ਗਏ ਹਨ ਅਤੇ ਉਨ੍ਹਾਂ ਤੋਂ ਪਾਕਿਸਤਾਨ ਦੇ ਵਜੂ਼ਦ ਨੂੰ ਖਤਰਾ ਪੈਦਾ ਹੋ ਗਿਆ ਹੈ। ਅਮਰੀਕਾ ਦੇ ਨੈਸ਼ਨਲ ਇੰਟੈਲੀਜੈਂਸ ਦੇ ਮੁਖੀ ਐਡਮਿਰਲ ਮਾਈਕਲ ਮੈਕਾਲੇਨ ਨੇ ਅਸਾਧਾਰਨ ਰੂਪ ਵਿੱਚ ਬਹੁਤ ਸਖਤ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਹੁਣ ਸਿਰਫ ਪਾਕਿਸਤਾਨੀ ਫੌਜ ਵਿੱਚ ਹੀ ਅਲ ਕਾਇਦਾ ਅਤੇ ਤਾਲਿਬਾਨ ਦੀਆਂ ਚੁਣੌਤੀਆਂ ਨਾਲ ਨਿਪਟਣ ਦੀ ਸਮਰੱਥਾ ਬਚੀ ਹੈ। ਪਾਕਿਸਤਾਨ ਵੀ ਹੁਣ ਆਪਣੀ ਹੋਂਦ ਖਤਰੇ ਵਿੱਚ ਮਹਿਸੂਸ ਕਰ ਰਿਹਾ ਹੈ ਜਿਸ ਦੇ ਮੱਦੇਨਜ਼ਰ ਉਸ ਦੀ ਲੀਡਰਸਿ਼ਪ ਵਧੇਰੇ ਹਮਲਾਵਰ ਕਦਮ ਉਠਾ ਰਹੀ ਹੈ। ਸੀਨੀਅਰ ਰਿਪਬਲਿਕਨ ਸੰਸਦ ਮੈਂਬਰ ਓਰਿਨ ਹੈਚ ਨੇ ਪਾਕਿਸਤਾਨੀ ਹਾਲਾਤ ਉੱਪਟ ਟਿੱਪਣੀ ਕਰਦਿਆਂ ਕਿਹਾ, “ਕਬਾਇਲੀ ਇਲਾਕਿਆਂ ਤੋਂ ਉੱਭਰਨ ਵਾਲਾ ਅੱਤਵਾਦ ਇੰਨਾ ਮਜਬੂਤ ਹੈ ਕਿ ਉਹ ਪਾਕਿਸਤਾਨ ਦੇ ਆਮ ਇਲਾਕਿਆਂ ਵਿੱਚ ਉੱਤਰ-ਪੱਛਮ ਸੀਮਾਂਤ ਪ੍ਰਾਂਤ ਵਿੱਚ ਫੈਲ ਗਿਆ ਹੈ। ਇਹ ਇਸਲਾਮਾਬਾਦ ਸਮੇਤ ਪਾਕਿਸਤਾਨ ਦੇ ਸ਼ਹਿਰਾਂ ਵਿੱਚ ਵੀ ਆਪਣੇ ਪੈਰ ਪਸਾਰ ਚੁੱਕਾ ਹੈ। ਜਿਸ ਦੀ ਸਭ ਤੋਂ ਸਨਸਨੀਖੇਜ ਮਿਸਾਲ ਬੇਨਜੀਰ ਭੁੱਟੋ ਦੀ ਹੱਤਿਆ ਹੈ।” ਅਮਰੀਕੀ ਨੈਸ਼ਨਲ ਇੰਟੈਲੀਜੈਂਸ ਦੇ ਨਿਰਦੇਸ਼ਕ ਦਾ ਇਹ ਵੀ ਕਹਿਣਾ ਸੀ ਕਿ ਛਾਪਾਮਾਰ ਵਿਰੋਧੀ ਕਾਰਵਾਈ ਦੇ ਸੰਚਾਲਨ ਲਈ ਪਾਕਿਸਤਾਨ ਫੌਜ ਕੋਲ ਢੁੱਕਵੀਂ ਸਿਖਲਾੲ ਦੀ ਕਮੀ ਹੈ। ਉਨ੍ਹਾਂ ਕਿਹਾ ਕਿ ਪਾਕਿਸਤਾਨੀ ਇਤਿਹਾਸ ਦਾ ਇਹ ਬਹੁਤ ਨਾਜ਼ੁਕ ਸਮਾਂ ਹੈ ਕਿਉਂਕਿ ਇਤਿਹਾਸ ਵਿੱਚ ਪਹਿਲੀ ਵਾਰ ਉਸ ਦੀ ਵਿਧਾਨ ਪਾਲਿਕਾ ਨੇ ਆਪਣਾ ਕਾਰਜਕਾਲ ਪੂਰਾ ਕੀਤਾ ਅਤੇ ਇਸ ਮਹੀਨੇ ਦੀ 18 ਤਰੀਕ ਨੂੰ ਨਵੀਆਂ ਆਮ ਚੋਣਾਂ ਹੋ ਰਹੀਆਂ ਹਨ।