|
ਸਚਿਨ ਤੋਂ ਸਬਕ ਲੈਣਾ ਚਾਹੀਦੈ ਸਾਨੀਆ ਨੂੰ |
|
Thursday, 07 February 2008 |
 ਨਵੀਂ ਦਿੱਲੀ - ਸਚਿਨ ਤੇਂਦੁਲਕਰ ਨੂੰ ਆਪਣਾ ਆਦਰਸ਼ ਦੱਸਣ ਵਾਲੀ ਸਾਨੀਆ ਮਿਰਜ਼ਾ ਨੂੰ ਭਾਰਤ ਵਿੱਚ ਟੈਨਿਸ ਨਾ ਖੇਡਣ ਦਾ ਫੈਸਲਾ ਬਦਲਣ ਲਈ ਤਿਰੰਗਾ ਵਿਵਾਦ ਵਿੱਚ ਫਸ ਚੁੱਕੇ ਮਾਸਟਰ ਬਲਾਸਟਰ ਸਚਿਨ ਤੇਂਦੁਲਕਰ ਸਮੇਤ ਉਨ੍ਹਾਂ ਕ੍ਰਿਕਟਰਾਂ ਤੋਂ ਸਬਕ ਲੈਣਾ ਚਾਹੀਦਾ ਹੈ, ਜੋ ਦੇਸ਼ ਦੇ ਖੇਡ ਪ੍ਰੇਮੀਆਂ ਦੇ ਸਖਤ ਰਵੱਈਏ ਦਾ ਸਿ਼ਕਾਰ ਬਣਦੇ ਰਹੇ ਹਨ। ਕਦੀ ਆਪਣੀ ਪੁਸ਼ਾਕ, ਕਦੀ ਮਸਜਿਦ ਦੇ ਕੰਪਲੈਕਸ ਵਿੱਚ ਸ਼ੂਟਿੰਗ ਅਤੇ ਹੁਣ ਰਾਸ਼ਟਰੀ ਝੰਡੇ ਦੇ ਅਪਮਾਨ ਦੇ ਦੋਸ਼ਾਂ ਤੋਂ ਦੁਖੀ ਸਾਨੀਆ ਨੇ ਭਾਰਤ ਵਿੱਚ ਟੂਰਨਾਮੈਂਟ ਵਿੱਚ ਨਾ ਖੇਡਣ ਦਾ ਫੈਸਲਾ ਕੀਤਾ ਹੈ ਅਤੇ ਇਸੇ ਦੇ ਤਹਿਤ ਉਹ ਬੰਗਲੌਰ ਓਪਨ ਵਿੱਚ ਹਿੱਸਾ ਨਹੀਂ ਲਵੇਗੀ। ਸਾਨੀਆ ਅਜਿਹੀ ਪਹਿਲੀ ਖਿਡਾਰਨ ਨਹੀਂ ਹੈ, ਜੋ ਤਿਰੰਗੇ ਦੇ ਅਪਮਾਨ ਨੂੰ ਲੈ ਕੇ ਵਿਵਾਦਾਂ ਵਿੱਚ ਘਿਰੀ ਹੈ, ਉਸ ਤੋਂ ਪਹਿਲਾਂ ਸਟਾਰ ਕ੍ਰਿਕਟਰ ਸਚਿਨ ਤੇਂਦੁਲਕਰ ਨੂੰ ਵੀ ਇਸੇ ਤਰ੍ਹਾਂ ਦੇ ਵਿਵਾਦ ਤੋਂ ਗੁਜ਼ਰਨਾ ਪਿਆ ਪਰ ਅੱਜ ਵੀ ਉਹ ਦੇਸ਼ ਦੇ ਕਰੋੜਾਂ ਲੋਕਾਂ ਦੇ ਦਿਲਾਂ ਵਿੱਚ ਵਸਿਆ ਹੋਇਆ ਹੈ। ਭਾਰਤੀ ਟੀਮ ਜਦੋਂ ਪਿਛਲੇ ਸਾਲ ਮਾਰਚ ਵਿੱਚ ਵਿਸ਼ਵ ਕੱਪ ਖੇਡਣ ਲਈ ਵੈਸਟਇੰਡੀਜ਼ ਗਈ ਸੀ ਤਾਂ ਉਸ ਦੌਰਾਨ ਜਮਾਇਕਾ ਵਿੱਚ ਭਾਰਤੀ ਹਾਈ ਕਮਿਸ਼ਨਰ ਦੇ ਐੱਲ.ਅਗਰਵਾਲ ਨੇ ਇੱਕ ਪਾਰਟੀ ਦਿੱਤੀ ਸੀ, ਜਿਸ ਵਿੱਚ ਸਚਿਨ ਨੇ ਰਾਸ਼ਟਰੀ ਝੰਡੇ ਦੇ ਰੰਗਾਂ ਵਾਲਾ ਬਣਿਆ ਕੇਕ ਕੱਟਿਆ ਸੀ। ਇੱਕ ਚੈਨਲ ਨੇ ਜਦੋਂ ਇਸ ਖਬਰਾ ਨੂੰ ਵਧਾ-ਚੜ੍ਹਾ ਕੇ ਪੇਸ਼ ਕੀਤਾ ਤਾਂ ਤੇਂਦੁਲਕਰ ਵਿਰੁੱਧ ਇੰਦੌਰ ਅਤੇ ਦਿੱਲੀ ਵਿੱਚ ਮਾਮਲਾ ਦਰਜ ਕੀਤਾ ਗਿਆ ਸੀ ਅਤੇ ਉਸ ਨੂੰ ਮੁਆਫੀ ਮੰਗਣੀ ਲਈ ਕਿਹਾ ਗਿਆ ਸੀ। ਸਾਨੀਆ ਨੇ ਇੱਕ ਸਮੇਂ ਤੇਂਦੁਲਕਰ ਨੂੰ ਆਪਣਾ ਆਦਰਸ਼ ਕਰਾਰ ਦਿੱਤਾ ਸੀ ਅਤੇ ਹੁਣ ਲੱਗਦਾ ਹੈ ਕਿ ਉਸ ਨੂੰ ਆਪਣੇ ਇਸ ਆਦਰਸ਼ ਤੋਂ ਸਬਕ ਸਿੱਖਣ ਦੀ ਲੋੜ ਹੈ ਕਿਉਂਕਿ ਭਾਰਤ ਵਿੱਚ ਨਾ ਖੇਡਣ ਦੇ ਫੈਸਲੇ ਨਾਲ ਉਸ ਨੇ ਇਸ ਵਿਵਾਦ ਨੂੰ ਹੋਰ ਤੂਲ ਦੇ ਕੇ ਆਲੋਚਨਾਵਾਂ ਨੂੰ ਹੀ ਸੱਦਾ ਦਿੱਤਾ ਹੈ। ਟੈਨਿਸ ਸਟਾਰ ਲੀਏਂਡਰ ਪੇਸ ਤੱਕ ਵੀ ਉਸ ਦੇ ਆਲੋਚਕਾਂ ਵਿੱਚ ਸ਼ਾਮਲ ਹੋ ਗਿਆ ਹੈ। ਪੇਸ ਨੇ ਕਿਹਾ ਕਿ ਹਰੇਕ ਮਸ਼ਹੂਰ ਹਸਤੀ ਨੂੰ ਦੇਖੋ, ਕਿਹੜਾ ਵਿਵਾਦਾਂ ਵਿੱਚ ਨਹੀਂ ਘਿਰਿਆ ਹੋਇਆ? ਸਾਡੇ ਸਾਹਮਣੇ ਔਖੇ ਹਾਲਾਤ ਆਉਂਦੇ ਰਹਿੰਦੇਨ ਅਤੇ ਹਰੇਕ ਮੰਨੀ-ਪ੍ਰਮੰਨੀ ਹਸਤੀ ਨੂੰ ਆਪਣੀ ਜਿ਼ੰਦਗੀ ਵਿੱਚ ਇਸ ਤਰ੍ਹਾਂ ਦੇ ਹਾਲਾਤ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਤੁਸੀਂ ਖੁਦ ਨੂੰ ਕਿਵੇਂ ਪੇਸ਼ ਕਰਦੇ ਹੋਏ ਅਤੇ ਇਸ ਨਾਲ ਕਿਵੇਂ ਨਿਪਟਦੇ ਹੋ, ਇਹੀ ਮਾਇਨੇ ਰੱਖਦਾ ਹੈ। ਸਾਨੀਆ ਨੂੰ ਕਦੇ ਸੁਨੀਲ ਗਾਵਸਕਰ, ਕਪਿਲ ਦੇਵ ਅਤੇ ਸਚਿਨ ਤੇਂਦੁਲਕਰ ਵਰਗੇ ਧਨੰਤਰ ਖਿਡਾਰੀਆਂ ਨੂੰ ਪੇਸ਼ ਆਏ ਉਲਟ ਹਾਲਾਤਾਂ ਦਾ ਸਾਹਮਣਾ ਨਹੀਂ ਕਰਨਾ ਪਿਆ।
|
