ਚੰਡੀਗੜ੍ਹ - ਅਗਲੇ ਸਾਲ ਲੋਕ ਸਭਾ ਦੀਆਂ ਚੋਣਾਂ ਦੇ ਮੱਦੇਨਜਰ ਅਤੇ ਗੁਜਰਾਤ-ਹਿਮਾਚਲ ਪ੍ਰਦੇਸ਼ ਦੀ ਕਰਾਰੀ ਹਾਰ ਤੋਂ ਪ੍ਰੇਸ਼ਾਨ ਕਾਂਗਰਸ ਦੇ ਜਨਰਲ ਸਕੱਤਰ ਅਤੇ ਯੁਵਾ ਨੇਤਾ ਰਾਹੁਲ ਗਾਂਧੀ ਨੇ ਪਾਰਟੀ ਵਿੱਚ 65 ਸਾਲ ਤੋ ਉੱਪਰ ਦੇ ‘ਚੱਲੇ ਕਾਰਤੂਸਾਂ’ ਨੂੰ ਬਾਹਰ ਕਰਕੇ ਯੁਵਾ ਨੇਤਾਵਾਂ ਨੂੰ ਉਤਸ਼ਾਹ ਦਿੰਦੇ ਹੋਏ ਪਾਰਟੀ ਵਿੱਚ ਨਵੀਂ ਜਾਨ ਫੂਕਣ ਲਈ ‘ਨਵੀਂ ਕਾਮਰਾਜ ਯੋਜਨਾ’ ‘ਤੇ ਅਮਲ ਕਰਨ ਦਾ ਮਨ ਬਣਾਇਆ ਹੈ। ਇਸ ਯੋਜਨਾ ਦੀ ਭਿਣਕ ਮਿਲਦੇ ਹੀ ਪਾਰਟੀ ਦੇ ਵੱਡੇ-ਵੱਡੇ ਨੇਤਾਵਾਂ ਦੇ ਪੈਰਾਂ ਹੇਠੋਂ ਜਮੀਨ ਖਿਸਕਣੀ ਸ਼ੁਰੂ ਹੋ ਗਈ ਹੈ ਅਤੇ ਪਾਰਟੀ ਨੂੰ ਪਾਰ ਲਾਉਣ ਵਾਲੇ ਅਤੇ ਕਰਨਦਾਰ ਸਮਝੇ ਜਾਣ ਵਾਲੇ ਬਜੁ਼ਰਗ ਮੰਤਰੀਆਂ ਅਤੇ ਪਾਰਟੀ ਦੇ ਅਹੁਦੇਦਾਰਾਂ ਵਿੱਚ ਭੜਥੂ ਮਚ ਗਿਆ ਹੈ। ਕਾਂਗਰਸ ਦੇ ਮੁੱਖ ਦਫਤਰ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਰਾਹੁਲ ਗਾਂਧੀ ਨੇ ਇਸ ਮਸਲੇ ‘ਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਅਤੇ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨਾਲ ਪਾਰਟੀ ਦੀ ‘ਡੈੱਡਵੁੱਡ’ ਨੂੰ ਬਾਹਰ ਸੁੱਟ ਕੇ ਨੌਜੁਆਨ ਨੇਤਾਵਾਂ ਨਾਲ ਪਾਰਟੀ ਨੂੰ ਮਜਬੂਤ ਬਣਾਉਣ ਲਈ ਗੰਭੀਰ ਵਿਚਾਰ ਵਟਾਂਦਰਾ ਕੀਤਾ।
ਕਾਂਗਰਸ ਪ੍ਰਧਾਨ ਨਾਲ ਆਪਣੀ ਬੈਠਕ ਤੋਂ ਪਹਿਲਾਂ ਰਾਹੁਲ ਗਾਂਧੀ ਨੇ ਅਲਵਰ ਦੇ ਰਾਜਕੁਮਾਰ ਜਤਿੰਦਰ ਸਿੰਘ, ਪਾਰਟੀ ਦੇ ਜਨਰਲ ਸਕੱਤਰ ਦਿਗਵਿਜੇ ਸਿੰਘ, ਸਚਿਨ ਪਾਇਲਟ, ਸਾਬਕਾ ਵਿਦਿਆਰਥੀ ਨੇਤਾ ਮਿਨਾਕਸ਼ੀ ਨਟਰਾਜਨ ਅਤੇ ਕੇਂਦਰੀ ਮੰਤਰੀਆਂ ਪੂਰਨ ਦੇਸ਼ਵਰੀ ਦੇਵੀ ਤੇ ਜੈ ਰਾਮ ਰਮੇਸ਼ ਜਿਹੇ ਆਪਣੇ ਨਜ਼ਦੀਕੀ ਨੌਜੁਆਨ ਆਗੂਆਂ ਨਾਲ ਇਸ ਸਿਲਸਿਲੇ ਵਿੱਚ ਪਿਛਲੇ ਹਫਤੇ ਬੰਦ ਕਮਰੇ ਵਿੱਚ ਇੱਕ ਲੰਮੀ ਮੀਟਿੰਗ ਕੀਤੀ ਜਿਸ ਵਿੱਚ ਇਸ ਯੋਜਨਾ ਦੀ ਰੂਪ-ਰੇਖਾ ਤਿਆਰ ਕੀਤੀ ਗਈ। ਇੱਥੇ ਜਿ਼ਕਰਯੋਗ ਹੈ ਕਿ ਰਾਹੁਲ ਗਾਂਧੀ ਜਦ ਤੋਂ ਅਮੇਠੀ ਤੋਂ ਸੰਸਦ ਮੈਂਬਰ ਚੁਣੇ ਗਏ ਹਨ, ਉਦੋਂ ਤੋਂ ਹੀ ਉਨ੍ਹਾਂ ਦੀ ਲੋਕਪ੍ਰਿਯਤਾ ਵਿੱਚ ਲਗਾਤਾਰ ਵਾਧਾ ਹੋਇਆ ਹੈ ਪਰ ਪਾਰਟੀ ਵਿੱਚ ਉਨ੍ਹਾਂ ਦੇ ਸਿੱਕੇ ਅਤੇ ਦਬਦਬੇ ਦੀ ਛਾਪ ਤਦ ਡੂੰਘੀ ਹੋਈ ਜਦੋਂ ਉਹ ਉੱਤਰ ਪ੍ਰਦੇਸ਼ ਦੇ ਸਾਬਕਾ ਕਾਂਗਰਸ ਪ੍ਰਧਾਨ ਸਲਮਾਨ ਖੁਰਸ਼ੀਦ ਨੂੰ ਉਨ੍ਹਾਂ ਦੇ ਅਹੁਦੇ ਤੋਂ ਉਖਾੜ ਸੁੱਟਣ ਵਿੱਚ ਸਫਲ ਹੋਏ ਸੀ। ਯੂ.ਪੀ. ਦੀਆਂ ਚੋਣਾਂ ਵਿੱਚ ਪਾਰਟੀ ਦੀ ਹਾਰ ਲਈ ਖੁਰਸ਼ੀਦ ਨੇ ਪਾਰਟੀ ਸੰਗਠਨ ਦੀ ਅਸਫਲਤਾ ਅਤੇ ਅਸਿੱਧੇ ਤੌਰ ‘ਤੇ ਰਾਹੁਲ ਨੂੰ ਹੀ ਜਿੰਮੇਵਾਰ ਠਹਿਰਾਇਆ ਸੀ।