7/23/08| ਦਿਮਾਗ ਦੇ ਲਈ ਕਮਰ ‘ਤੇ ਰੱਖੋ ਕਾਬੂ |
| Sunday, 30 March 2008 | |
|
ਲੰਡਨ- ਦਿਮਾਗ ਸਹੀ ਰੱਖਣਾ ਹੈ ਤਾਂ ਕਮਰ ਦੇ ਮਾਪ ‘ਤੇ ਵੀ ਨਜ਼ਰ ਰੱਖਣੀ ਹੋਵੇਗੀ। ਇਕ ਖੋਜ ਵਿਚ ਪਤਾ ਲੱਗਿਆ ਹੈ ਕਿ ਉਮਰ ਦੇ ਚੌਥੇ ਦਹਾਕੇ ਵਿਚ ਚੌੜੀ ਹੁੰਦੀ ਕਮਰ ਬੁਢਾਪੇ ਵਿਚ ਡਿਮੇਂਸ਼ੀਆ (ਯਾਦ ਸ਼ਕਤੀ ਵਿਚ ਨੁਕਸਾਨ) ਦੇ ਖ਼ਤਰੇ ਨੂੰ ਤਿੰਨ ਗੁਣਾਂ ਤੱਕ ਵਧਾ ਸਕਦੀ ਹੈ। ਵਰਣਨਯੋਗ ਹੈ ਕਿ ਇਹ ਤਾਂ ਪਹਿਲਾਂ ਤੋਂ ਹੀ ਪਤਾ ਹੈ ਕਿ ਮੋਟਾਪੇ ਤੋਂ ਅਲਜਾਈਮਰ (ਭੁੱਲਣ ਦੀ ਬਿਮਾਰੀ) ਦਾ ਖ਼ਤਰਾ ਵੱਧ ਜਾਂਦਾ ਹੈ ਪਰ ਨਵੇਂ ਅਧਿਐਨ ਦੇ ਮੁਤਾਬਕ ਵਜਨ ਆਮ ਹੁੰਦਿਆਂ ਹੋਇਆਂ ਵੀ ਕਮਰ ਦੀ ਚੌੜਾਈ ਜ਼ਿਆਦਾ ਹੋਣ ‘ਤੇ ਇਸ ਬਿਮਾਰੀ ਦਾ ਖ਼ਤਰਾ ਦੱਸਿਆ ਗਿਆ ਹੈ। ਪ੍ਰਮੁੱਖ ਖੋਜਕਾਰ ਰੋਸ਼ੇਲ ਵਿਹਸਮਰ ਦੀ ਅਗਵਾਈ ਵਿਚ ਅੰਤਰ-ਰਾਸ਼ਟਰੀ ਖੋਜਕਾਰਾਂ ਨੇ ਆਪਣੇ ਅਧਿਐਨ ਵਿਚ ਪਾਇਆ ਕਿ ਚੌੜੀ ਕਮਰ ਵਾਲੇ 20 ਫੀਸਦੀ ਲੋਕਾਂ ਵਿਚ ਆਮ ਕਮਰ ਵਾਲੇ ਲੋਕਾਂ ਦੀ ਤੁਲਨਾ ਵਿਚ ਡਿਮੇਂਸ਼ੀਆ ਦਾ ਖ਼ਤਰਾ 270 ਫੀਸਦੀ ਜ਼ਿਆਦਾ ਸੀ। ਇੱਥੋਂ ਤੱਕ ਕਿ ਬਾਡੀ ਮਾਸ ਇੰਡੈਕਸ (ਲੰਬਾਈ ਦੇ ਮੁਤਾਬਕ ਵਜਨ ਦਾ ਅਨੁਪਾਤ) ਦੇ ਅਨੁਸਾਰ ਆਮ ਵਜਨ ਦੇ ਚੌੜੀ ਕਮਰ ਵਾਲੇ ਲੋਕਾਂ ਵਿਚ ਵੀ ਔਸਤਨ ਪਤਲੀ ਕਮਰ ਵਾਲਿਆਂ ਦੀ ਤੁਲਨਾ ਵਿਚ ਡਿਮੇਂਸ਼ੀਆ ਦਾ ਖ਼ਤਰਾ 90 ਫੀਸਦੀ ਜ਼ਿਆਦਾ ਪਾਇਆ ਗਿਆ। ਜੋ ਲੋਕ ਬਾਡੀ ਮਾਸ ਇੰਡੈਕਸ ਦੇ ਹਿਸਾਬ ਨਾਲ ਜ਼ਿਆਦਾ ਵਜਨ ਵਾਲੇ ਜਾਂ ਮੋਟੇ ਕਰਾਰ ਦਿੱਤੇ ਗਏ, ਪਰ ਉਹਨਾਂ ਦੀ ਕਮਰ ਦੀ ਚੌੜਾਈ ਆਮ ਸੀ, ਉਹਨਾਂ ਦੇ ਡਿਮੇਸ਼ੀਆ ਦਾ ਸ਼ਿਕਾਰ ਹੋਣ ਦਾ ਖ਼ਤਰਾ 80 ਫੀਸਦੀ ਹੀ ਪਾਇਆ ਗਿਆ। ਦੂਜੇ ਪਾਸੇ ਓਵਰਵੇਟ ਹੋਣ ਦੇ ਨਾਲ ਚੌੜੀ ਕਮਰ ਵਾਲੇ ਲੋਕਾਂ ਵਿਚ ਇਹ ਖ਼ਤਰਾ 230 ਫੀਸਦੀ ਤੱਕ ਪਾਇਆ ਗਿਆ। ਜੋ ਲੋਕ ਕਮਰ ਚੌੜੀ ਹੋਣ ਦੇ ਨਾਲ-ਨਾਲ ਮੋਟੇ ਵੀ ਸਨ, ਉਹਨਾਂ ਵਿਚ ਤਾ ਡਿਮੇਂਸ਼ੀਆ ਦਾ ਖ਼ਤਰਾ 360 ਫੀਸਦੀ ਜ਼ਿਆਦਾ ਪਾਇਆ ਗਿਆ। ਇਸ ਅਧਿਐਨ ਵਿਚ 6583 ਲੋਕਾਂ ਨੂੰ ਸ਼ਾਮਲ ਕੀਤਾ ਗਿਆ ਸੀ। ਇਹਨਾਂ ਸਾਰਿਆਂ ਦੀ ਉਮਰ 40 ਤੋਂ 45 ਸਾਲ ਵਿਚਕਾਰ ਸੀ। ਬਾਅਦ ਵਿਚ ਜਦੋਂ ਸਾਰੇ ਉਮਰ ਦੇ ਸੱਤਵੇਂ ਦਹਾਕੇ ਵਿਚ ਪਹੁੰਚੇ ਤਾਂ ਇਹਨਾਂ ਦੀ ਸਿਹਤ ‘ਤੇ ਨਜ਼ਰ ਰੱਖੀ ਗਈ। ਦੇਖਿਆ ਗਿਆ ਕਿ ਕਿਹੜੀ ਬਿਮਾਰੀ ਦਾ ਸ਼ਿਕਾਰ ਹੋਏ ਅਤੇ ਕਿਸਦੀ ਸਿਹਤ ਔਸਤਨ ਚੰਗੀ ਰਹੀ। ਇਸੇ ਆਧਾਰ ‘ਤੇ ਖੋਜਕਾਰਾਂ ਨੇ ਨਤੀਜਾ ਕੱਢਿਆ। |
| < Prev | Next > |
|---|
