|
ਸ੍ਰੋਮਣੀ ਕਮੇਟੀ ਦਾ 3 ਅਰਬ 86 ਕਰੋੜ 72 ਲੱਖ 12 ਹਜ਼ਾਰ 4 ਸੌ ਰੁਪਏ ਦਾ ਬਜਟ ਪਾਸ |
|
Sunday, 30 March 2008 |
|
ਅੰਮ੍ਰਿਤਸਰ - ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਵਿੱਤੀ ਸਾਲ 2008-09 ਦਾ ਸਾਲਾਨਾ ਬਜਟ ਵਿਰੋਧੀ ਧਿਰ ਵੱਲੋਂ ਹੰਗਾਮਾ ਖੜ੍ਹਾ ਕਰਨ ਦੇ ਬਾਵਜੂਦ 3 ਅਰਬ 86 ਕਰੋੜ 72 ਲੱਖ 12 ਹਜ਼ਾਰ 4 ਸੌ ਰੁਪਏ ਦਾ ਪਾਸ ਕਰ ਦਿੱਤਾ ਗਿਆ ਜੋ ਪਿਛਲੇ ਸਾਲ ਨਾਲੋਂ 56 ਕਰੋੜ 3 ਲੱਖ 74 ਹਜ਼ਾਰ 3 ਸੌ 71 ਰੁਪਏ ਵੱਧ ਹੈ। ਇਸ ਵਾਰ ਬਜਟ ਵਿਚ ਸਭ ਤੋਂ ਜਿ਼ਆਦਾ ਜ਼ੋਰ ਵਿੱਦਿਆ ਅਤੇ ਧਰਮ ਪ੍ਰਚਾਰ ‘ਤੇ ਦਿੱਤਾ ਗਿਆ। ਬਜਟ ਇਜਲਾਸ ਸ੍ਰੋਮਣੀ ਕਮੇਟੀ ਦੇ ਤੇਜਾ ਸਿੰਘ ਸਮੁੰਦਰੀ ਹਾਲ ਵਿੱਚ ਬਾਅਦ ਦੁਪਹਿਰ ਸ਼ੁਰੂ ਹੋਇਆ। ਅਰਦਾਸ ਉਪਰੰਤ ਬਜਟ ਦੀ ਸ਼ੁਰੂਆਤ ਸ੍ਰੋਮਣੀ ਕਮੇਟੀ ਦੇ ਸਕੱਤਰ ਸ. ਹਰਬੇਅੰਤ ਸਿੰਘ ਨੇ ਕੀਤੀ ਅਤੇ ਸ਼ੋਕ ਮਤੇ ਪੜ੍ਹਨ ਲਈ ਕਿਹਾ। ਇਸ ਦੇ ਬਾਅਦ ਸ੍ਰੋਮਣੀ ਕਮੇਟੀ ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਭੌਰ ਨੇ ਬਜਟ ਭਾਸ਼ਣ ਪੜ੍ਹਿਆ ਅਤੇ ਬਾਅਦ ਵਿੱਚ ਮਤੇ ਹਾਊਸ ਵਿੱਚ ਪੇਸ਼ ਕੀਤੇ, ਜਿਨ੍ਹਾਂ ਨੂੰ ਜੈਕਾਰਿਆਂ ਦੀ ਗੂੰਜ ਦੇ ਨਾਲ ਪ੍ਰਵਾਨ ਕਰ ਲਿਆ ਗਿਆ। ਬਜਟ ਭਾਸ਼ਣ ਖਤਮ ਹੋਣ ‘ਤੇ ਵਿਰੋਧੀ ਧਿਰ ਦੇ ਆਗੂਆਂ ਨੂੰ ਬੋਲਣ ਦਾ ਅਧਿਕਾਰ ਨਾ ਦਿੱਤਾ ਗਿਆ ਤਾਂ ਉਹ ਆਪਣੇ ਸਾਥੀਆਂ ਸਮੇਤ ਬਜਟ ਸੈਸ਼ਨ ਦਾ ਬਾਈਕਾਟ ਕਰਕੇ ਅਤੇ ਸ੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਮੱਕੜ ਦੀ ਕਾਰਗੁਜ਼ਾਰੀ ਵਿਰੁੱਧ ਬੋਲਦੇ ਹੋਏ ਹਾਊਸ ਤੋਂ ਬਾਹਰ ਚਲੇ ਗਏ। ਇਸ ਸਮੇਂ ਵਿਰੋਧੀ ਧਿਰ ਦੇ ਆਗੂਆਂ ਨੇ ਐਲਾਨ ਕੀਤਾ ਕਿ ਉਹ ਸਿੱਖ ਜੁਡੀਸ਼ੀਅਲ ਕਮਿਸ਼ਨ ਦੇ ਕੋਲ ਇਨਸਾਫ ਦੇ ਲਈ ਇਸ ਬਜਟ ਨੂੰ ਚੁਣੌਤੀ ਦੇਣਗੇ ਅਤੇ ਜੇ ਉੱਥੋਂ ਵੀ ਇਨਸਾਫ ਨਾ ਮਿਲਿਆ ਤਾਂ ਉਹ ਹਾਈਕੋਰਟ ਦਾ ਵੀ ਦਰਵਾਜ਼ਾ ਖੜਕਾਉਣ ਦੇ ਲਈ ਤਿਆਰ ਹਨ ਅਤੇ ਇਹ ਸਭ ਕੁਝ ਜਲਦੀ ਹੀ ਹੋਵੇਗਾ।
|
