|
ਜੀਨ ਤੈਅ ਕਰਦੇ ਹਨ ਕੱਦ ਦੀ ਉਚਾਈ! |
|
Wednesday, 09 April 2008 |
ਨਿਊਯਾਰਕ- ਵਿਗਿਆਨੀਆਂ ਦੇ ਸਾਹਮਣੇ ਹੁਣ ਇਹ ਤਸਵੀਰ ਕਾਫੀ ਸਾਫ ਹੋ ਗਈ ਹੈ ਕਿ ਕੁਝ ਲੋਕਾਂ ਦਾ ਕੱਦ ਕਿਉਂ ਲੰਮਾ ਹੁੰਦਾ ਹੈ ਅਤੇ ਕੁਝ ਦਾ ਕਿਉਂ ਨਹੀਂ। ਖੋਜਕਾਰਾਂ ਨੇ ਪਿਛਲੇ ਸਾਲ ਇਕ ਅਜਿਹੇ ਪਹਿਲੇ ਜੀਨ ਨੂੰ ਲੱਭਿਆ ਸੀ ਜੋ ਕੱਦ ਨੂੰ ਪ੍ਰਭਾਵਿਤ ਕਰਦਾ ਸੀ। ਹੁਣ ਉਹਨਾਂ ਨੇ 20 ਅਜਿਹੇ ਜੀਨਾਂ ਦੀ ਭਾਲ ਕੀਤੀ ਹੈ ਜੋ ਕਿਸੇ ਵਿਅਕਤੀ ਦੇ ਕੱਦ ਵਿਚ ਕੁੱਲ ਮਿਲਾ ਕੇ ਛੇ ਸੈਂਟੀਮੀਟਰ ਤੱਕ ਦਾ ਫਰਕ ਪਾ ਸਕਦੇ ਹਨ। ਇਸ ਖੋਜ ਦੇ ਲਈ 30 ਹਜ਼ਾਰ ਲੋਕਾਂ ਦੇ ਡੀ. ਐਨ. ਏ. ਦੇ ਸੈਂਪਲ ਲੈ ਕੇ ਇਸ ਨਤੀਜੇ ‘ਤੇ ਪਹੁੰਚਿਆ ਗਿਆ ਹੈ। ਨੇਚਰ ਜੈਨੇਟਿਕਸ ਮੈਗਜ਼ੀਨ ਵਿਚ ਇਸ ਸਬੰਧ ਵਿਚ ਦੋ ਖੋਜਾਂ ਪ੍ਰਕਾਸ਼ਿਤ ਹੋਈਆਂ ਹਨ, ਜਿਹਨਾਂ ਵਿਚ ਕਿਹਾ ਗਿਆ ਹੈ ਕਿ ਸਾਇੰਸਦਾਨਾਂ ਨੇ ਸਾਡੇ ਕੱਦ ਨੂੰ ਪ੍ਰਭਾਵਿਤ ਕਰਨ ਵਾਲੇ ਦਰਜਨਾਂ ਜੈਨੇਟਿਕ ਖੇਤਰਾਂ ਦੀ ਪਛਾਣ ਕਰ ਲਈ ਹੈ। ਇਸ ਖੋਜ ਤੋਂ ਸਾਇੰਸਦਾਨਾਂ ਨੂੰ ਇਹ ਪਤਾ ਲਗਾਉਣ ਵਿਚ ਵੀ ਆਸਾਨੀ ਹੋਵੇਗੀ ਕਿ ਸਾਡਾ ਸਰੀਰ ਕਿਵੇਂ ਵਧਦਾ ਹੈ ਅਤੇ ਆਮ ਤੌਰ ‘ਤੇ ਕਿਵੇਂ ਵਿਕਸਤ ਹੁੰਦਾ ਹੈ। ਹੱਡੀਆਂ ਸਬੰਧੀ ਅਤੇ ਕੈਂਸਰ ਦੀਆਂ ਬਿਮਾਰੀਆਂ ‘ਤੇ ਵੀ ਨਵੀਂ ਜਾਣਕਾਰੀ ਮਿਲ ਸਕਦੀ ਹੈ।
ਸਰੀਰ ਦੇ ਆਕਾਰ ਦੇ ਬਾਰੇ ਮੋਟਾਪੇ ਵਰਗੀਆਂ ਕਈ ਵਿਸ਼ੇਸ਼ਤਾਵਾਂ ਜੀਨ ਅਤੇ ਸਮਾਜਿਕ ਮਾਹੌਲ ‘ਤੇ ਨਿਰਭਰ ਕਰਦੀਆਂ ਹਨ, ਪਰ ਇਨਸਾਨ ਦੇ ਕੱਦ ਵਿਚ 90 ਫੀਸਦੀਅੰਤਰ ਦੇ ਕਾਰਨ ਖੁਰਾਕ ਨਹੀਂ ਬਲਕਿ ਜੀਨ ਹੈ। ਪਿਛਲੇ ਸਾਲ ਵਿਗਿਆਨੀਆਂ ਨੇ ਇਕ ਅਜਿਹੇ ਪਹਿਲੇ ਆਮ ਜੀਨ ਦੀ ਖੋਜ ਕੀਤੀ ਸੀ ਜੋ ਕੱਦ ‘ਤੇ ਸਿਰਫ 0.5 ਸੈਂਟੀਮੀਟਰ ਦਾ ਅੰਤਰ ਹੀ ਪਾਉਂਦਾ ਸੀ। ਇਕ ਵਿਗਿਆਨੀ ਟਿਮ ਫ੍ਰੇਲਿੰਗ ਨੇ ਦੱਸਿਆ ਕਿ ਅਸੀਂ ਜਿਹਨਾਂ ਵੱਖ-ਵੱਖ ਕਿਸਮਾਂ ਦੇ ਜੀਨ ਦੀ ਖੋਜ ਕੀਤੀ ਹੈ, ਉਹਨਾਂ ਤੋਂ ਪਤਾ ਲੱਗਦਾ ਹੈ ਕਿ ਲੰਮੀਆਂ ਹੱਡੀਆਂ ਵਿਚ ਮੌਜੂਦ ਕੁਝ ਖਾਸ ਜੀਨਾਂ ਤੋਂ ਹੀ ਕੱਦ ‘ਤੇ ਪ੍ਰਭਾਵ ਨਹੀਂ ਪੈਂਦਾ ਹੈ।
|
