|
ਸੋਨੀਆ ਦੀ ਘੁਰਕੀ ਦੇ ਬਾਵਜੂਦ ਕੈਪਟਨ ਅਤੇ ਭੱਠਲ ਦੀ ਅੰਦਰੂਨੀ ਘੂਰ-ਘੱਪ ਜਾਰੀ |
|
Thursday, 24 April 2008 |
ਪਟਿਆਲਾ-ਕਾਂਗਰਸ ਦੀ ਕੁਲ ਹਿੰਦ ਪ੍ਰਧਾਨ ਸ੍ਰੀਮਤੀ ਸੋਨੀਆ ਗਾਂਧੀ ਵਲੋਂ ਪੰਜਾਬ ਦੇ ਦੋ ਸੀਨੀਅਰ ਆਗੂਆਂ ਦਾ ਵਿਵਾਦ ਸੁਲਝਾਏ ਨੂੰ ਅਜੇ 24 ਘੰਟੇ ਵੀ ਨਹੀਂ ਹੋਏ ਹਨ ਪਰ ਅਜੇ ਵੀ ਇਨ੍ਹਾਂ ਆਗੂਆਂ ਦਾ ਆਪਸੀ ਮੱਤਭੇਦ ਜਾਰੀ ਹੈ। ਪੰਜਾਬ ਕਾਂਗਰਸ ਅੰਦਰਲੀ ਵਿਰੋਧਤਾ ਅੱਜ ਵੀ ਵੇਖਣ ਨੂੰ ਮਿਲੀ। ਹਾਲਾਂਕਿ ਪੰਜਾਬ ਕਾਂਗਰਸ ਦੀ ਪ੍ਰਧਾਨ ਬੀਬੀ ਰਾਜਿੰਦਰ ਕੌਰ ਭੱਠਲ ਨੇ ਇਹ ਤਾਂ ਕਹਿ ਦਿਤਾ ਕਿ ਸਾਡੀ ਸ੍ਰੀਮਤੀ ਸੋਨੀਆ ਗਾਂਧੀ ਨੇ ਸੁਲਾਹ ਕਰਾ ਦਿਤੀ ਹੈ ਪਰ ਅੱਜ ਜੋ ਵੀ ਇਥੇ ਦੇਖਣ ਨੂੰ ਮਿਲਿਆ ਉਹ ਸਪੱਸ਼ਟ ਕਰਦਾ ਹੈ ਕਿ ਕਾਂਗਰਸ ਹਾਈ ਕਮਾਂਨ ਵੀ ਪੰਜਾਬ ਦੇ ਮਾਮਲੇ ਸੁਧਾਰਨ ਵਿਚ ਨਾਕਾਮਯਾਬ ਹੀ ਰਹਿ ਗਈ ਹੈ। ਇਸੇ ਕਰ ਕੇ ਅੱਜ ਪੰਜਾਬ ਬੰਦ ਦਾ ਸੱਦਾ ਵੀ ਠੁਸ ਹੋ ਕੇ ਰਹਿ ਗਿਆ ਤੇ ਇਹ ਸਪੱਸ਼ਟ ਹੋ ਗਿਆ ਕਿ ਦੋਵੇਂ ਲੀਡਰ ਹੁਣ ਇਕ-ਦੂਜੇ ਨੂੰ ਠਿਬੀ ਲਾਉਣ ਦੀ ਹੀ ਨਹੀਂ ਸਗੋਂ ਇਕ-ਦੂਜੇ ਨੂੰ ਸਿਆਸੀ ਤੌਰ ‘ਤੇ ਖ਼ਤਮ ਕਰਨਾ ਚਾਹੁੰਦੇ ਹਨ। ਪ੍ਰਾਪਤ ਹੋਈ ਜਾਣਕਾਰੀ ਅਨੁਸਾਰ ਅੱਜ ਬੀਬੀ ਭੱਠਲ ਦੇ ਕੈਪਟਨ ਦੇ ਹੀ ਸ਼ਹਿਰ ਵਿਚ ਗੱਜਣ ਦਾ ਸੁਪਨਾ ਤਾਂ ਸ਼ਾਇਦ ਪੂਰਾ ਹੋ ਗਿਆ ਪਰ ਉਹ ਹਜ਼ਾਰਾਂ ਲੋਕਾਂ ਨੂੰ ਭਾਸਣ ਸੁਣਾਉਣ ਦਾ ਸੁਪਨਾ ਸਿਰਫ਼ ਢਾਈ ਟੋਟਰੂਆਂ ਅਗੇ ਹੀ ਅਪਣੀ ਕੈਪਟਨ ਵਿਰੁਧ ਭੜਾਸ ਕਢਣ ਤਕ ਸੀਮਤ ਹੋ ਕੇ ਰਹਿ ਗਿਆ। ਹੈਰਾਨੀ ਦੀ ਗੱਲ ਇਹ ਹੋਈ ਕਿ ਪਟਿਆਲਾ ਨਾਲ ਸਬੰਧਤ ਕਾਂਗਰਸੀ ਮੁੱਖ ਲੀਡਰ ਵੀ ਇਥੇ ਨਹੀਂ ਪੁੱਜੇ ਤੇ ਜਸਜੀਤ ਸਿੰਘ ਰੰਧਾਵਾ ਵਰਗੇ ਸਾਬਕਾ ਮੰਤਰੀ ਵੀ ਸਮੇਂ ਤੋਂ ਪਹਿਲਾਂ ਹੀ ਚਲੇ ਗਏ ਤੇ ਯੂਥ ਕਾਂਗਰਸ ਦੇ ਪੰਜਾਬ ਪ੍ਰਧਾਨ ਵਿਜੈ ਇੰਦਰ ਸਿੰਗਲਾ ਵਰਗੇ ਵੀ ਇਥੇ ਹਾਜ਼ਰ ਨਹੀ ਸਨ। ਕੈਪਟਨ ਖ਼ੇਮੇ ਦੇ ਹੀ ਜ਼ਿਲ੍ਹਾ ਸ਼ਹਿਰੀ ਪ੍ਰਧਾਨ ਸ੍ਰੀ ਪੀ.ਕੇ. ਪੁਰੀ ਨੇ ਕਿਹਾ ਕਿ ਮੈਨੂੰ ਤਾਂ ਕਿਸੇ ਨੇ ਸੱਦਿਆ ਹੀ ਨਹੀਂ ਸੀ, ਇਸ ਕਰ ਕੇ ਮੈਨੂੰ ਕੀ ਲੋੜ ਪਈ ਹੈ ਇਸ ਲੜਾਈ ਵਿਚ ਪੈਣ ਦੀ। ਇਸੇ ਤਰ੍ਹਾਂ ਮੀਤ ਪ੍ਰਧਾਨ ਮਨੋਜ ਸੋਹੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਵੀ ਨਹੀਂ ਬੁਲਾਇਆ ਗਿਆ। ਚੱਕਾ ਜਾਮ ਵਿਚ ਜ਼ਿਲ੍ਹਾ ਯੂਥ ਪ੍ਰਧਾਨ ਸ਼ਰਨਜੀਤ ਸਿੰਘ ਜੋਗੀਪੁਰ, ਸ਼ਹਿਰੀ ਪ੍ਰਧਾਨ ਪਟਿਆਲਾ ਸੰਜੀਵ ਬਿੱਟੂ, ਵੇਦ ਪ੍ਰਕਾਸ਼ ਗੁਪਤਾ, ਮਲੋਹਤਰਾ, ਭੁਪਿੰਦਰ ਕੌਰ ਕੌਰਜੀਵਾਲਾ ਆਦਿ ਸੀਨੀਅਰ ਲੀਡਰ ਨਹੀਂ ਪੁਜੇ। ਭੱਠਲ ਖ਼ੇਮੇ ਦੇ ਚੱਕਾ ਜਾਮ ਵਿਜ ਪਹੁੰਚੇ ਆਗੂਆਂ ਲਾਲ ਸਿੰਘ, ਬੀਰਦਵਿੰਦਰ ਸਿੰਘ, ਬ੍ਰਹਮ ਮਹਿੰਦਰਾ, ਸੁਰਿੰਦਰ ਸਿੰਗਲਾ ਆਦਿ ਨੇ ਅਸਿਧੇ ਰੂਪ ਵਿਚ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਹੀ ਹਮਲੇ ਕੀਤੇ। ਉਨ੍ਹਾਂ ਕਿਹਾ ਕਿ ਜਿਹੜੀ ਕਿਤਾਬ ਲਿਖੀ ਗਈ ਹੈ ਉਸ ਦਾ ਸਾਰਿਆਂ ਨੂੰ ਪਤਾ ਹੈ ਕਿ ਕਿਸ ਨੇ ਲਿਖਾਈ ਹੈ। ਉਨ੍ਹਾਂ ਕਿਹਾ ਕਿ ਇਹ ਵੀ ਲੋਕ ਜਾਣਦੇ ਹਨ ਕਿ ਕੌਣ ਕਾਂਗਰਸ ਵਿਚ ਹਮੇਸ਼ਾ ਤੋਂ ਹੀ ਰਹਿ ਰਿਹਾ ਹੈ ਤੇ ਕੋਣ ਕਦੇ ਅਕਾਲੀ ਦਲ ਵਿਚ ਅਤੇ ਕਦੇ ਕਿਸੇ ਹੋਰ ਤਰੀਕੇ ਨਾਲ ਕਾਂਗਰਸ ਵਿਚ ਆਇਆ ਹੈ। ਬੀਬੀ ਭੱਠਲ ਦੇ ਲੰਚ ਦਾ ਪ੍ਰੋਗਰਾਮ ਕੈਪਟਨ ਅਮਰਿੰਦਰ ਸਿੰਘ ਦੇ ਨਜ਼ਦੀਕੀ ਹਰਚੰਦ ਸਿੰਘ ਬਰਸਟ ਦੇ ਘਰ ਰਖਿਆ ਗਿਆ। ਬਰਸਟ ਨੇ ਇਸ ਬਾਰੇ ਇਹ ਕਹਿ ਕੇ ਮੀਡੀਆ ਨੂੰ ਟਾਲ ਦਿਤਾ ਕਿ ਬੀਬੀ ਹੁਣ ਕਾਂਗਰਸ ਦੀ ਪ੍ਰਧਾਨ ਹੈ ਤੇ ਉਨ੍ਹਾਂ ਘਰ ਆਉਣ ਦੀ ਇੱਛਾ ਪ੍ਰਗਟਾਈ ਸੀ ਤੇ ਮੈਂ ਕਿਵੇਂ ਨਾਂ ਕਰ ਸਕਦਾ ਸੀ?
|
