|
ਭਾਰਤ ‘ਚ ਮੱਧਵਰਗ ਦੀ ਖ਼ੁਸ਼ਹਾਲੀ ਕਾਰਨ ਅਨਾਜ ਸੰਕਟ ਪੈਦਾ ਹੋਇਆ: ਬੁਸ਼ |
|
Saturday, 03 May 2008 |
 ਵਾਸ਼ਿੰਗਟਨ-ਅਮਰੀਕੀ ਵਿਦੇਸ਼ ਮੰਤਰੀ ਕੌਡਾਲੀਜ਼ਾ ਰਾਈਸ ਦੇ ਬਿਆਨ ਕਿ ਭਾਰਤੀਆਂ ਦੇ ਜ਼ਿਆਦਾ ਖਾਣ ਨਾਲ ਵਿਸ਼ਵ ਬਾਜ਼ਾਰ ਵਿਚ ਅਨਾਜਾਂ ਦੀ ਕੀਮਤ ਵੱਧ ਰਹੀ ਹੈ, ਦੇ ਬਾਅਦ ਰਾਸ਼ਟਰਪਤੀ ਜਾਰਜ ਬੁਸ਼ ਵੀ ਮੰਨਣ ਲੱਗੇ ਹਨ ਕਿ ਭਾਰਤੀ ਮੱਧ ਵਰਗ ਦੀ ਖ਼ੁਸ਼ਹਾਲੀ ਕਾਰਨ ਅਨਾਜ ਦੀਆਂ ਕੀਮਤਾਂ ਅਸਮਾਨ ਛੂਹ ਰਹੀਆਂ ਹਨ। ਬੁਸ਼ ਨੇ ਕਿਹਾ ਕਿ ਭਾਰਤ ਵਿਚ 35 ਕਰੋੜ ਲੋਕ ਮੱਧ ਵਰਗ ਵਿਚ ਆਉਂਦੇ ਹਨ, ਜੋ ਅਮਰੀਕਾ ਦੀ ਪੂਰੀ ਵਸੋਂ ਤੋਂ ਵੱਧ ਹੈ ਅਤੇ ਜਦੋਂ ਤੁਸੀ ਪੈਸਾ ਕਮਾਉਣਾ ਸ਼ੁਰੂ ਕਰਦੇ ਹੋ ਤਾਂ ਤੁਸੀ ਚੰਗਾ-ਚੋਖਾ ਖਾਣ ਦੀ ਮੰਗ ਕਰਦੇ ਹੋ। ਇਸ ਤਰ੍ਹਾਂ ਮੰਗ ਵੱਧਣ ਨਾਲ ਕੀਮਤਾਂ ਵਿਚ ਵਾਧਾ ਹੁੰਦਾ ਹੈ। ਪਿਛਲੇ ਹਫ਼ਤੇ ਰਾਈਸ ਨੇ ਵੀ ਕਿਹਾ ਸੀ ਕਿ ਚੀਨ ਅਤੇ ਭਾਰਤ ਦੇ ਲੋਕਾਂ ਦੀ ਖ਼ੁਰਾਕ ਵਿਚ ਵਾਧਾ ਅਤੇ ਇਨ੍ਹਾਂ ਦੇਸ਼ਾਂ ਵਲੋਂ ਅਨਾਜ ਬਰਾਮਦ ‘ਤੇ ਪਾਬੰਦੀ ਲਗਾ ਦੇਣ ਕਾਰਨ ਵਿਸ਼ਵ ਵਿਚ ਅਨਾਜ ਸੰਕਟ ਪੈਦਾ ਹੋਇਆ ਹੈ। ਰਾਈਸ ਨੇ ਕਿਹਾ ਸੀ ਕਿ ਜੈਵਿਕ ਬਾਲਣ ਦੇ ਉਤਪਾਦਨ ਵਿਚ ਅਨਾਜਾਂ ਦੀ ਵਰਤੋਂ ਖ਼ੁਰਾਕ ਸੰਕਟ ਨੂੰ ਡੂੰਘਾ ਕਰ ਸਕਦੀ ਹੈ ਪਰ ਬੁਸ਼ ਨੇ ਇਸ ਤੋਂ ਉਲਟ ਮੱਕੀ ਤੋਂ ਐਥੇਨੋਲ ਬਨਾਉਣ ਨੂੰ ਕੀਮਤਾਂ ਵੱਧਣ ਦਾ ਕਾਰਨ ਮੰਨਣ ਤੋਂ ਇਨਕਾਰ ਕਰ ਦਿਤਾ। ਬੁਸ਼ ਨੇ ਐਥੇਨੋਲ ਬਨਾਉਣ ਦੀ ਹਮਾਇਤ ਕਰਦਿਆਂ ਅਨਾਜ ਦੀਆਂ ਵਧਦੀਆਂ ਕੀਮਤਾਂ ਲਈ ਤੇਲ ਅਤੇ ਖਾਦਾਂ ਦੀਆਂ ਕੀਮਤਾਂ ਵਿਚ ਵਾਧੇ ਕਾਰਨ ਖੇਤੀ ਲਾਗਤ ਵਿਚ ਹੋਏ ਵਾਧੇ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਬੁਸ਼ ਨੇ ਮੌਸਮ ਸਬੰਧੀ ਮੁਸ਼ਕਲਾਂ ਨੂੰ ਵੀ ਜ਼ਿੰਮੇਵਾਰ ਦਸਦਿਆਂ ਕਿਹਾ ਕਿ ਅਨਾਜ ਉਤਪਾਦਨ ਦੇ ਕੁੱਝ ਵੱਡੇ ਇਲਾਕੇ ਸੋਕੇ ਤੋਂ ਪ੍ਰਭਾਵਤ ਹਨ। ਬੁਸ਼ ਨੇ ਕਿਹਾ ਕਿ ਅਮਰੀਕਾ ਨੇ ਅਨਾਜ ਸੰਕਟ ਨਾਲ ਨਿਪਟਣ ਲਈ ਕਾਫ਼ੀ ਸਹਾਇਤਾ ਦਿਤੀ ਹੈ। ਮੈਂ ਕਾਂਗਰਸ ਨੂੰ ਇਸ ਲਈ ਹੋਰ ਪੈਸਾ ਦੇਣ ਦੀ ਅਪੀਲ ਕੀਤੀ ਹੈ।
|
