ਗਾਤਨਾ-ਗੁਆਮ ‘ਚ ਅਮਰੀਕੀ ਰਾਸ਼ਟਰਪਤੀ ਅਹੁਦੇ ਦੇ ਹੋਈਆਂ ਪ੍ਰਾਇਮਰੀ ਚੋਣਾਂ ‘ਚ ਡੈਮੋਕ੍ਰੇਟਿਕ ਪਾਰਟੀ ਦੇ ਬਰਾਕ ਉਬਾਮਾ ਨੇ ਅਪਣੀ ਹੀ ਪਾਰਟੀ ਦੀ ਹਿਲੇਰੀ ਕਲਿੰਟਨ ਨੂੰ ਸਿਰਫ਼ 7 ਵੋਟਾਂ ਨਾਲ ਹਰਾ ਦਿਤਾ। ਪ੍ਰਸ਼ਾਂਤ ਮਹਾਂਸਾਗਰ ‘ਚ ਸਥਿਤ ਇਸ ਛੋਟੇ ਜਿਹੇ ਟਾਪੂ ‘ਚ ਵੋਟਾਂ ਤੋਂ ਬਾਅਦ 12 ਘੰਟੇ ਤਕ ਚੱਲੀ ਗਿਣਤੀ ‘ਚ ਉਬਾਮਾ ਨੂੰ 2264 ਵੋਟ ਜਦਕਿ ਹਿਲੇਰੀ ਨੂੰ 2257 ਵੋਟ ਪ੍ਰਾਪਤ ਹੋਏ। ਇਸ ਵਾਰ ਪ੍ਰਾਇਮਰੀ ਚੋਣਾਂ ‘ਚ ਰਿਕਾਰਡ ਗਿਣਤੀ ‘ਚ ਵੋਟਰਾਂ ਨੇ ਅਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਕੀਤੀ, ਜਦਕਿ ਸਾਲ 2004 ‘ਚ ਸਿਰਫ਼ 1500 ਵਿਅਕਤੀਆਂ ਨੇ ਇਸ ਦੀ ਵਰਤੋਂ ਕੀਤੀ ਸੀ। ਉਬਾਮਾ ਦੇ ਪ੍ਰਚਾਰ ਪ੍ਰਬੰਧਕ ਜੋਸ਼ ਟਿਨੋਰੀਉ ਨੇ ਕਿਹਾ ਕਿ ਇਨ੍ਹਾਂ ਚੋਣਾਂ ਤੋਂ ਸਪਸ਼ਟ ਹੈ ਕਿ ਦੋਵੇਂ ਹੀ ਬਹੁਤ ਲੋਕਪ੍ਰਿਅ ਹਨ ਅਤੇ ਸਾਨੂੰ ਸੱਭ ਨੂੰ ਇਸ ਗੱਲ ਦੀ ਖ਼ੁਸ਼ੀ ਮਨਾਉਣੀ ਚਾਹੀਦੀ ਹੈ।