ਡਗਲਸ- ਅਮੀਰਾਂ ‘ਚ ਅਮੀਰ ਮੁਲਕ ਅਮਰੀਕਾ ‘ਚ ਮੁਫਤ ਭੋਜਨ ‘ਤੇ ਨਿਰਭਰ ਲੋਕਾਂ ਦੀ ਗਿਣਤੀ ਵੱਧ ਰਹੀ ਹੈ। ਖੁਰਾਕ ਬੈਂਕਾਂ ‘ਚ ਉਹਨਾਂ ਲੋਕਾਂ ਦੀ ਗਿਣਤੀ ਵੱਧ ਰਹੀ ਹੈ, ਜੋ ਸੰਘਰਸ਼ ਕਰਕੇ ਵੀ ਆਪਣੇ ਘਰਾਂ ਲਈ ਪੂਰਾ ਭੋਜਨ ਨਹੀਂ ਹਾਸਲ ਕਰ ਸਕਦੇ। ਇਕ ਸਾਲ ‘ਚ ਇਹ ਗਿਣਤੀ 15 ਤੋਂ ਵੱਧ ਕੇ 20 ਫੀਸਦੀ ਹੋ ਗਈ ਹੈ ਤੇ ਕਈ ਭੋਜਨ ਬੈਂਕਾਂ ਨੂੰ ਸਭ ਨੂੰ ਸੰਭਾਲਣਾ ਔਖਾ ਹੋ ਗਿਆ ਹੈ। ਇਹ ਜਾਣਕਾਰੀ ਅਮਰੀਕਾ ਦੇ ਸਭ ਤੋਂ ਵੱਡੇ ਭੋਜਨ ਬੈਂਕ ਸੈਕਿੰਡ ਹਾਰਵੈਸਟ ਨੇ ਦਿੱਤੀ ਹੈ। ਇਸ ਬੈਂਕ ਦੀਆਂ 200 ਹੋਰ ਸ਼ਾਖਾਵਾਂ ਵੀ ਹਨ। ਭੋਜਨ ਬੈਂਕ ਨੈਟਵਰਕ ਤਾਜ਼ਾ ਤੇ ਨਾ ਖਰਾਬ ਹੋਣ ਵਾਲੇ ਉਤਪਾਦਨ, ਸਪਲਾਇਰਾਂ ਤੋਂ ਖਰੀਦ ਕੇ ਗੁਦਾਮਾਂ ‘ਚ ਰੱਖ ਲੈਂਦਾ ਹੈ ਤੇ ਫਿਰ ਦੇਸ਼ ਭਰ ਵਿਚ ਸਮੂਹਿਕ ਭੋਜਨ ਬੈਂਕਾਂ ਦੀ ਲੜੀ ਰਾਹੀਂ ਇਸ ਦੀ ਵੰਡ ਕੀਤੀ ਜਾਂਦੀ ਹੈ। ਭਾਵੇਂ ਇਸ ਖੁਰਾਕ ਦੀ ਵਰਤੋਂ ਕਰਨ ਵਾਲੇ ਲੋਕਾਂ ਦੀ ਸਹੀ ਗਿਣਤੀ ਨਹੀਂ ਪਤਾ ਪਰ ਇਸ ਤੋਂ ਅਮਰੀਕਾ ਦੀ ਆਰਥਿਕਤਾ ਦੀ ਗਿਰਾਵਟ ਦਾ ਜ਼ਰੂਰ ਪਤਾ ਲੱਗਦਾ ਹੈ। ਅਸਮਾਨੀ ਚੜ੍ਹੀਆਂ ਤੇਲ ਕੀਮਤਾਂ ਤੇ ਹੋਰ ਵਸਤਾਂ ਲਈ ਮਹਿੰਗਾਈ ਵਧਣ ਨਾਲ ਜਾਂ ਤਾਂ ਲੋਕ ਇੱਕਦਮ ਹੇਠਲੇ ਆਮਦਨ ਸਮੂਹ ‘ਚ ਆ ਗਏ ਹਨ ਜਾਂ ਫਿਰ ਬੇਰੁਜ਼ਗਾਰੀ ਭੁਗਤ ਰਹੇ ਹਨ।
 ਬੈਂਕਾਂ ਦਾ ਕਹਿਣਾ ਹੈ ਕਿ ਚੰਗੀਆਂ-ਭਲੀਆਂ ਨੌਕਰੀਆਂ ਵਾਲੇ ਲੋਕ ਮੁਫਤ ਭੋਜਨ ਬੈਂਕਾਂ ਕੋਲ ਆ ਰਹੇ ਹਨ। ਉਹ ਫਾਰਮ ਭਰ ਕੇ ਮੁਫਤ ਜਾਂ ਰਿਆਇਤੀ ਦਰ ‘ਤੇ ਰਾਸ਼ਨ ਖਰੀਦ ਰਹੇ ਹਨ। ਉੱਤਰੀ ਡਕੌਟਾ ‘ਚ ਗਰੇਟ ਪਲੇਜ਼ ਫੂਡ ਬੈਂਕ ਦੀ ਤਰਜਮਾਨ ਮਾਹਸ਼ੀਆ ਪੋਲਸਨ ਅਨੁਸਾਰ ਹੁਣ ਘੱਟ ਉਜਰਤ ਵਾਲੀ ਜਾਂ ਫਿਰ ਦੋ ਤਿੰਨ ਨੌਕਰੀਆਂ ਵੀ ਕਾਫੀ ਨਹੀਂ ਹਨ। ਇੱਥੇ ਘੱਟੋ-ਘੱਟ ਅੱਧੇ ਘਰ ਫੂਡ ਸਟੈਂਪਸ ਦਾ ਲਾਭ ਲੈ ਰਹੇ ਹਨ। ਸਰਕਾਰੀ ਭੋਜਨ ਲੈਣ ਲਈ ਖੁਰਾਕੀ ਮੋਹਰ ਦੀ ਵੀ ਮੰਗ ਵੱਧ ਗਈ ਹੈ।