| ਇਕ ਅਰਬ ਡਾਲਰ ਤਾਂ ਸਾਲਾਨਾ ਕੈਨੇਡਾ ਦੇ ਪਿਆਕੜਾਂ ਦੇ ਇਲਾਜ ‘ਤੇ ਹੀ ਖਰਚ ਹੋ ਜਾਂਦਾ ਹੈ |
| Wednesday, 18 June 2008 | |
|
ਟੋਰਾਂਟੋ- ਸੈਂਟਰ ਆਫ ਡੀ ਅਡਿਕਸ਼ਨ ਐਂਡ ਮੈਂਟਲ ਹੈਲਥ ਨਾਂ ਦੀ ਸੰਸਥਾ ਵੱਲੌਂ ਜਾਰੀ ਕੀਤੇ ਗਏ ਤਾਜ਼ਾ ਅੰਕੜਿਆਂ ਵਿਚ ਕਿਹਾ ਗਿਆ ਹੈ ਕਿ ਕੈਨੇਡਾ ਵਿਚ ਸ਼ਰਾਬੀਆਂ ਦੇ ਇਲਾਜ ਲਈ ਸਾਲਾਨਾ ਇਕ ਬਿਲੀਅਨ ਡਾਲਰ ਖਰਚ ਆਉਂਦਾ ਹੈ। ਇਸ ਤਰ੍ਹਾਂ ਕੈਨੇਡਾ ਦੇ ਹਰੇਕ ਬਾਸ਼ਿੰਦੇ ਦੇ ਹਿੱਸੇ 463 ਡਾਲਰ ਆਉਂਦੇ ਹਨ। ਸੈਂਟਰ ਦਾ ਕਹਿਣਾ ਹੈ ਕਿ ਸ਼ਰਾਬ ਦੇ ਇਲਾਜ ਦਾ ਖਰਚਾ ਕੈਂਸਰ ਦੇ ਖਰਚ ਨਾਲੋਂ ਵੀ ਵੱਧ ਗਿਆ ਹੈ। ਇਸ ਤਾਜ਼ਾ ਸਟੱਡੀ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ ਜੇ ਸ਼ਰਾਬ ਦੀ ਬਿਮਾਰੀ ਨੂੰ ਘੱਟ ਕਰਨਾ ਹੈ ਤਾਂ ਸ਼ਰਾਬ ਪੀਣ ਦੀ ਉਮਰ ਵਧਾ ਕੇ 21 ਸਾਲਾ ਕਰ ਦੇਣੀ ਚਾਹੀਦੀ ਹੈ, ਜਿਸ ਨਾਲ ਵੱਧ ਜਾਨਾਂ ਵੀ ਬਚ ਸਕਦੀਆਂ ਹਨ ਅਤੇ ਖਰਚ ਵੀ ਘੱਟ ਸਕਦਾ ਹੈ। ਇਹ ਵੀ ਸੁਝਾਅ ਦਿੱਤਾ ਗਿਆ ਹੈ ਕਿ ਸ਼ਰਾਬ ਮਹਿੰਗੀ ਕਰ ਦੇਣੀ ਚਾਹੀਦੀ ਹੈ, ਜਿਸ ਨਾਲ ਸ਼ਰਾਬ ਦੀ ਖਪਤ ਘੱਟ ਜਾਵੇਗੀ। ਹੋਰ ਸੁਝਾਵਾਂ ਵਿਚ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਲਈ ਖੂਨ ਵਿਚ ਸ਼ਰਾਬ ਦੀ ਮਿਕਦਾਰ 0.08 ਤੋਂ ਘਟਾ ਕੇ 0.05 ਕਰਨਾ ਸ਼ਾਮਲ ਹੈ, ਜਿਸ ਨਾਲ ਵੀ ਹਾਦਸੇ ਘੱਟ ਸਕੇਦ ਹਨ। ਸੈਂਟਰ ਦਾ ਕਹਿਣਾ ਹੈ ਕਿ ਸ਼ਰਾਬ ਨਾਲ ਸਬੰਧਤ ਇਲਾਜ ਦਾ ਖਰਚਾ ਬਹੁਤ ਹੀ ਜ਼ਿਆਦਾ ਹੈ ਅਤੇ ਇਸ ਬਾਰੇ ਸਰਕਾਰ ਨੂੰ ਕੁਝ ਸਖਤ ਕਦਮ ਚੁੱਕਣੇ ਪੈਣਗੇ। ਯਾਦ ਰਹੇ ਬੀਤੇ ਹਫਤੇ ਹੀ ਇਕ ਰਿਪੋਰਟ ਆਈ ਸੀ, ਜਿਸ ਵਿਚ ਕਿਹਾ ਗਿਆ ਸੀ ਕਿ ਕੈਨੇਡਾ ਦੇ ਲੋਕ ਹੁਣ ਪਹਿਲਾਂ ਨਾਲੋਂ ਸ਼ਰਾਬ ਦਾ ਵੱਧ ਸੇਵਨ ਕਰਦੇ ਹਨ ਅਤੇ ਸੈਂਟਰ ਦਾ ਕਹਿਣਾ ਹੈ ਕਿ ਸ਼ਰਾਬ ਦਾ ਸੇਵਨ ਘਟਾਉਣ ਵਾਸਤੇ ਕੋਈ ਤਰਕੀਬ ਕੱਢਣੀ ਬਹੁਤ ਹੀ ਜ਼ਰੂਰੀ ਹੈ, ਨਹੀਂ ਤਾਂ ਸ਼ਰਾਬੀਆਂ ਦੇ ਇਲਾਜ ਦੇ ਵੱਧ ਰਹੇ ਬੋਝ ਕਾਰਨ ਇਹ ਬਿਮਾਰੀ ਕੈਨੇਡਾ ਦੇ ਹੈਲਥ ਸਿਸਟਮ ਨੂੰ ਇਕ ਦਿਨ ਲੈ ਡੁੱਬੇਗੀ। |
| < Prev | Next > |
|---|
