ਕੈਲੀਫੋਰਨੀਆ- ਸੈਕਰਾਮੈਂਟੋ ਵਿਚ ਅਮਰੀਕਾ ਦੀਆਂ ਵੱਖ-ਵੱਖ ਸਕਿਊਰਟੀ ਏਜੰਸੀਆਂ ਦੀ ਮੀਟਿੰਗ ਵਿਚ ਸ਼ਾਮਲ ਸਿੱਖ ਪ੍ਰਤੀਨਿਧੀ ਸ. ਦਰਸ਼ਨ ਸਿੰਘ ਮੁੰਡੀ ਨੇ ਏਜੰਸੀਆਂ ਤੋਂ ਮੰਗ ਕੀਤੀ ਕਿ ਭਾਵੇਂ ਪਹਿਲਾਂ ਨਾਲੋਂ ਸਿੱਖਾਂ ਨਾਲ ਘ੍ਰਿਣਾ ਘਟੀ ਹੈ ਤੇ ਕੁਝ ਥਾਵਾਂ ਉਪਰ ਅਜੇ ਵੀ ਬਦਸਲੂਕੀ ਜਾਰੀ ਹੈ। ਏਜੰਸੀਆਂ ਨੂੰ ਮੁਖਾਤਿਬ ਹੁੰਦਿਆਂ ਉਹਨਾਂ ਕਿਹਾ ਕਿ ਸੈਨਫਰਾਂਸਿਸਕੋ ਹਵਾਈ ਅੱਡੇ ‘ਤੇ ਅਜੇ ਵੀ ਸਿੱਖਾਂ ਨੂੰ ਤੰਗ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਤੇ ਸੈਕਰਾਮੈਂਟੋ ਹਵਾਈ ਅੱਡੇ ਉਤੇ ਆਈ ਤਬਦੀਲੀ ਲਈ ਉਨ੍ਹਾਂ ਟੀ. ਐਸ. ਏ. ਦਾ ਧੰਨਵਾਦ ਕੀਤਾ। ਬਾਕੀ ਏਜੰਸੀਆਂ ਵਿਚ ਸ਼ਾਮਲ ਐਫ. ਬੀ. ਆਈ., ਸੈਰਫ ਡਿਪਾਰਟਮੈਂਟ, ਟੀ. ਐਸ. ਏ.  ਹੋਮਲੈਂਡ ਸਕਿਊਰਟੀ ਦੇ ਪ੍ਰਤੀਨਿਧਾਂ ਨੂੰ ਇਹ ਵੀ ਕਿਹਾ ਗਿਆ ਕਿ ਉਹ ਕੈਲੀਫੋਰਨੀਆ ਤੋਂ ਇਲਾਵਾ ਹੋਰ ਸੂਬਿਆਂ ਵਿਚ ਵੀ ਸਿੱਖਾਂ ਦੀ ਜਾਣਕਾਰੀ ਬਾਰੇ ਮੂਵੀ ਉਥੋਂ ਦੀਆਂ ਏਜੰਸੀਆਂ ਨੂੰ ਦਿਖਾਉਣ ਤਾਂ ਜੋ ਸਿੱਖਾਂ ਨਾਲ ਬਦਸਲੂਕੀ ਨਾ ਹੋ ਸਕੇ ਅਤੇ ਅਮਰੀਕੀ ਅਧਿਕਾਰੀਆਂ ਨੂੰ ਸਿੱਖਾਂ ਦੇ ਕਕਾਰਾਂ ਬਾਰੇ  ਪਤਾ ਲੱਗ ਸਕੇ। ਸ. ਮੁੰਡੀ ਨੇ ਕਿਹਾ ਕਿ ਜੇਕਰ ਜਾਣਕਾਰੀ ਲੈਣੀ ਹੋਵੇ ਤਾਂ ਹੋਮਲੈਂਡ ਸਕਿਊਰਟੀ ਦੀ ਵੈਬਸਾਈਟ ਤੋਂ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।