|
ਲਾਦੇਨ ਪਰਿਵਾਰ ਖਰੀਦੇਗਾ ਫੁਟਬਾਲ ਕਲੱਬ! |
|
Tuesday, 08 July 2008 |
 ਲੰਡਨ- ਬ੍ਰਿਟੇਨ ਦੇ ਨਿਊਕੈਸਲ ਯੂਨਾਈਟਿਡ ਫੁਟਬਾਲ ਕਲੱਬ ਨੂੰ ਅਲ-ਕਾਇਦਾ ਪ੍ਰਮੁੱਖ ਓਬਾਮਾ ਬਿਨ ਲਾਦੇਨ ਦੇ ਪਰਿਵਾਰ ਨੂੰ ਵੇਚਣ ਦੀ ਯੋਜਨਾ ਨੇ ਕਲੱਬ ਦੇ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਵਰਣਨਯੋਗ ਹੈ ਕਿ ਬਿਨ ਲਾਦੇਨ ਪਰਿਵਾਰ ਇਕ ਅਰਬੀ ਨਿਰਮਾਣ ਫਰਮ ਦਾ ਮਾਲਕ ਹੈ। ਫਰਮ ਨੇ ਕਲੱਬ ਦੇ ਮਾਲਕ ਮਾਈਕ ਐਸਲੇ ਨੂੰ ਤੀਹ ਕਰੋੜ ਪੌਂਡ ਦੇ ਕੇ ਪ੍ਰੀਮੀਅਰ ਲੀਗ ਜਾਇੰਟਸ ਦਾ ਮਾਲਕਾਨਾ ਹੱਕ ਲੈਣ ਦਾ ਮਨ ਬਣਾ ਲਿਆ ਹੈ। ਇਸ ਤੋਂ ਇਲਾਵਾ ਲਾਦੇਨ ਪਰਿਵਾਰ ਸੇਂਟ ਜੇਮਸ ਪਾਰਕ ਦੇ ਨੇੜੇ ਆਰਾਮ ਸਥਾਨ ਅਤੇ ਰੀਟੇਲ ਇੰਡਸਟਰੀ ਸਥਾਪਤ ਕਰਨ ਦੇ ਲਈ ਲੱਖਾਂ ਖਰਚ ਕਰਨ ਦੀ ਤਿਆਰੀ ਵੀ ਕਰ ਰਿਹਾ ਹੈ। ਇਸ ਸਬੰਧ ਵਿਚ ਫਰਮ ਦੇ ਪ੍ਰਤੀਨਿਧੀ ਸ਼ਹਿਰ ਵਿਚ ਰਹਿ ਕੇ ਉਚਿਤ ਸਥਾਨ ਦੀ ਤਲਾਸ਼ ਕਰ ਰਹੇ ਹਨ।
ਇੰਡੀਪੈਡੈਂਟ ਨਿਊਕੈਸਲ ਯੂਨਾਈਟਿਡ ਸਪੋਰਟਸ ਐਸੋਸੀਏਸ਼ਨ ਦੇ ਫ੍ਰੈਂਕ ਗਿਲਮਰ ਨੇ ਇਸਨੂੰ ਕੋਰੀ ਬਕਵਾਸ ਅਤੇ ਭੱਦਾ ਮਜ਼ਾਕ ਕਰਾਰ ਦਿੰਦੇ ਹੋਏ ਕਿਹਾ ਹੈ ਕਿ ਮਾਈਕ ਨੂੰ ਕਲੱਬ ਦੇ ਪ੍ਰਸ਼ੰਸਕਾਂ ਦੀਆਂ ਭਾਵਨਾਵਾਂ ਦਾ ਅਪਮਾਨ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ। ਹੁਣ ਸਭ ਕੁਝ ਉਹਨਾਂ ਦੀ ਸੋਚ ‘ਤੇ ਨਿਰਭਰ ਕਰਦਾ ਹੈ ਕਿ ਉਹ ਵਾਕਿਆ ਹੀ ਇਕ ਅੱਤਵਾਦੀ ਦੇ ਪਰਿਵਾਰ ਨੂੰ ਕਲੱਬ ਵੇਚ ਦੇਣਾ ਚਾਹੁੰਦੇ ਹਨ। 9/11 ਦੀ ਘਟਨਾ ਤੋਂ ਪਹਿਲਾਂ ਹੀ ਲਾਦੇਨ ਪਰਿਵਾਰ ਦੇ ਅੱਤਵਾਦੀ ਸਰਗਣਾ ਨਾਲ ਖਤਮ ਹੋ ਚੁੱਕੇ ਸਬੰਧਾਂ ਤੋਂ ਪ੍ਰਸ਼ੰਸਕਾਂ ‘ਤੇ ਕੋਈ ਫਰਕ ਨਹੀਂ ਪੈਂਦਾ। ਉਹ ਆਪਣੀ ਵਿਰਾਸਤ ਅੱਤਵਾਦੀ ਦੇ ਪਰਿਵਾਰ ਨੂੰ ਨਹੀਂ ਸੌਂਪਣਾ ਚਾਹੁੰਦੇ। ਵਰਣਨਯੋਗ ਹੈ ਕਿ ਲਾਦੇਨ ਦੇ ਨਾਂ ਤੋਂ ਹੀ ਅਮਰੀਕਾ ਅਤੇ ਯੂਰਪ ਦੇ ਲੋਕ ਘਬਰਾ ਜਾਂਦੇ ਹਨ। ਡਰ ਦੀ ਇਹ ਭਾਵਨਾ ਅਮਰੀਕਾ ਅਤੇ ਯੂਰਪ ਦੇ ਕਈ ਦੇਸ਼ਾਂ ਵਿਚ ਅਲ-ਕਾਇਦਾ ਦੁਅਰਾ ਕੀਤੇ ਗਏ ਹਮਲਿਆਂ ਕਾਰਨ ਪੈਦਾ ਹੋਈ।
|
